Sara Björk flogin til Frakklands með Ragnar Frank sinn

Sara Björk eignaðist Ragnar Frank Árnason 16. nóvember síðastliðinn og strákurinn fór í sitt fyrsta alþjóðlega flug í morgun aðeins eins og hálfs mánaða.

Sara hefur verið á Íslandi síðustu mánuði en hún er enn leikmaður franska stórliðsins Olympique Lyon og fram undan er að hefja æfingar á ný í Frakklandi.

Olympique Lyon gaf það strax úr að félagið ætlaði að standa á bak við Söru Björk í endurkomu henni inn á knattspyrnuvöllinn.

Nú tekur við krefjandi tími hjá henni að koma sér aftur í knattspyrnuform. Stóra verkefnið er að komast aftur inn í íslenska landsliðið fyrir Evrópumótið í Englandi í sumar.

Eins og sjá má hér fyrir neðan þá sagði Sara Björk frá því að hún væri nú farin aftur til Frakklands eftir tíu mánaða fjarveru.

„Tíu mánuðum seinna. Varð ófrísk, eignaðist yndislegan dreng, eyddi ómetanlegum tíma með fjölskyldunni og lagði mikla vinnu á mig. Núna er tími til að snúa aftur til Lyon,“ skrifaði Sara Björk á ensku á Instagram síðu sína.

„Hlakka til að hitta liðið mitt aftur. Get ekki beðið eftir að snúa aftur og leggja á mig þá miklu vinnu sem þarf til að koma mér aftur inn á knattspyrnuvöllinn,“ skrifaði Sara.

„Flýg til baka sem móðir og með fjölskyldunni minni sem er extra sérstakt fyrir mig. Ég vonast til að veita öðrum konum innblástur um að þú þarft ekki að fórna ferlinum til að eignast fjölskyldu. Það er hægt að gera bæði,“ skrifaði Sara.