Öruggur sigur Njarðvíkinga gegn ÍR

Njarðvíkingar virtust sterkari aðilinn allt frá upphafi og leiddu með sjö stigum að fyrsta leikhluta loknum. Liðið vann svo annan leikhluta með 14 stigum og staðan í hálfleik var því 57-36.

Meira jafnræði var með liðunum í síðari hálfleik, en það var þó aldrei spurning hvorum megin sigurinn myndi enda. Njarðvíkingar unnu að lokum 28 stiga sigur, 109-81.

Haukur Helgi Pálsson átti flottan leik í liði Njarðvíkinga og skoraði 18 stig ásamt því að taka sjö fráköst og gefa tvær stoðsendingar. Stigahæstur heimamanna var þó Dedrick Deon Basile með 19 stig. 

Í liði gestanna voru þeir Triston Isaiah Simpson og Jordan Semple atkvæðamestir með 17 stig hvor.