Hjalteyrarmálið: Reiknar með að starfshópurinn skili af sér í janúar

Fréttastofa hefur undanfarnar vikur fjallað um heimilið og rætt við fólk sem hefur sagt frá hræðilegu kynferðislegu, líkamlegu og andlegu ofbeldi sem það varð fyrir á heimilinu á Hjalteyri á áttunda áratug síðustu aldar.

Ákveðið var að stofna þriggja manna starfshóp undir forystu Vigdísar til að afla nauðsynlegra gagna og upplýsinga um starfsemi heimilisins á Hjalteyri svo unnt sé að taka ákvarðanir um hvort og með hvaða hætti starfsemin verði tekin til frekari rannsóknar og þá hver aðkoma viðkomandi sveitarfélaga skuli vera.

Vigdís segir að starfshópurinn hafi nú þegar fundað í tvö skipti en auk Vigdísar sitja Ásgeir Örn Blöndal Jóhannsson lögmaður og Halldór Þormar Halldórsson, umsjónarmaður sanngirnisbóta í starfshópinum.

Vinna hópsins hefur í fyrstu snúist um að setja saman verkáætlun að sögn Vigdísar.

Verkefni hópsins er afmarkað

Verkefni hins nýstofnaða starfshóps munu ná til þess að lýsa tildrögum að starfsemi heimilisins, lýsa því hvernig opinberu eftirliti var háttað og skila tillögum til stjórnvalda um frekari viðbrögð og afmörkun verkefnisins.

Hópurinn á einnig að lýsa þeim lagahindrunum sem eru fyrir frekari rannsókn málsins og eftir atvikum að leggja fram tillögu að því hvort niðurstöður starfshópsins kalli á lagabreytingar. Miðað er við að starfshópurinn taki meðal annars til nánari skoðunar rannsóknir og skýrslur vistheimildanefndar.

„Álitaefnið sem við stöndum frammi fyrir er hvort eigi að fara út í rannsóknir á vistun barna á einkaheimilum, það virðist vera af fréttaflutningi og öðrum gögnum að um einkaheimili hafi verið að ræða,“ sagði Vigdís í Reykjavík síðdegis í dag.

Hópurinn mun ekki vinna eiginlega rannsókn um hvað gekk á á heimilinu. Segja má að starfshópurinn sinni eins konar undirbúningsvinnu.

„Okkar hlutverk er fyrst og fremst að greina eðli þessarar starfsemi fyrir stjórnvöld og afmarka það fyrir áframhaldandi vinnu,“ sagði Vigdís.

Vigdís reiknar með að hópurinn klári sína vinnu undir lok janúars á næsta ári.

„Við stefnum að því miðað við verkáætlunina að ljúka okkar vinnu í kringum janúar, lok janúar. Við ætlum að vinna þetta hratt og vel, þetta er aðkallandi og það er mikill vilji hjá ráðherra að fá lausn þessara mála fljótt og örugglega.“

Er hægt að túlka þetta sem svo að þetta sé skref í rétt átt, í átt að réttlæti fyrir þá sem þarna dvöldu?

„Já, ég tel það.“