Þórsarar bíða enn eftir íþróttahúsinu sem þeir áttu að fá 1995

Fyrr í vikunni skrifaði Árni Rúnar Jóhannesson, formaður handknattleiksdeildar Þórs, pistil á Akureyri.net þar sem hann fjallar um bágborna aðstöðu félagsins til handboltaiðkunar. Þórsarar eru orðnir langþreyttir á ástandinu og dreymir um íþróttahús við Hamar.

„Ég vildi bara vekja athygli á þessu. Mér finnst hafa verið mikil þögn í kringum þetta alltof lengi. Það er skammarlegt hvernig þetta er,“ sagði Árni í samtali við Vísi í gær.

Handboltaiðkendur hjá Þór þurfa að flakka á milli Íþróttahallarinnar á Akureyri og íþróttahússins við Síðuskóla sem er með óviðunandi áhorfendaaðstöðu. Og tengingin við félagssvæði Þórs, Hamar, er lítil.

„Höllin er góð en hún er barn síns tíma. Það vantar kjarna. Við viljum íþróttahús á félagssvæðið. Það er búið að teikna það og allt. Við viljum gera íþróttamiðstöð þarna, eins og Egilshöll,“ sagði Árni.

Telur að iðkendafjöldinn tvöfaldist

Að sögn Árna eru um tvö hundruð handboltaiðkendur í Þór. Viðbúið er að þeim fjölgi talsvert þegar íbúðahverfi fyrir ofan Síðuskóla rísi. Og ekki minnkar þörfin á betri aðstöðu við það.

„Þegar þetta íbúðahverfi byggist upp mun iðkendafjöldinn allavega tvöfaldast held ég. Aðstaðan er ekki boðleg,“ sagði Árni. „Karfan er í Höllinni, við erum í Höllinni og svo eru alls konar viðburðir þarna. Síðan eru íþróttir fyrir MA, VMA og Brekkuskóla. Höllin er þétt setin og hún er eini löglegi handboltavöllurinn á Akureyri fyrir utan KA-heimilið.“

Eftir að Árni skrifaði pistilinn var honum bent á grein sem Páll Jóhannesson skrifaði á heimasíðu Þórs í fyrra. Þar fjallar hann um að á áttatíu ára afmæli Þórs, 1995, hafi verið búið að samþykkja byggingu íþróttahúss við Hamar og búið að safna styrkjum.

Skóflan ekki enn verið notuð

Á afmælishófi Þórs 28. október 1995 afhenti meira að segja formaður KA formanni Þórs stunguspaða til að taka fyrstu skóflustunguna að nýja íþróttahúsinu. En nokkrir bæjarfulltrúar lögðust gegn byggingu hússins og töldu hana ekki brýna. Og Þórsarar bíða enn eftir íþróttahúsinu.

„Það er gríðarlega mikið íþróttastarf í bænum, við erum í öllum íþróttum en aðstaðan er ekki hundrað prósent neins staðar. Það er alltaf verið að lagfæra þetta með bótum og bútum. Það er mjög aðkallandi að Þór fái íþróttahús á félagssvæðið. Það myndi bæta umgjörðina hjá félaginu og yrði lyftistöng fyrir það,“ sagði Árni.

Í pistlinum segir að hann að bæjarfulltrúar á Akureyri hafi beðið Þórsara um að hætta með handbolta vegna aðstöðuleysis.

Þetta er þverpólítíkst

„Það eru fleiri en einn og fleiri en tveir sem hafa komið með þá bón að við leggjum handboltann niður,“ sagði Árni. Hann vildi ekki nafngreina bæjarfulltrúana en sagði að þeir fyrstu beiðnirnar um þetta hafi borist í vor og sú síðasta fyrir um tveimur mánuðum.

„Þetta er þverpólítíkst. Það virðist vera einhver bylgja þarna niður frá, að fólk hafi séð að það sé ódýrara að leggja handknattleiksdeildina niður frekar en að byggja. Það er mjög skrítið að þeir biðji íþróttafélög um að leggja niður deildir.“

Hann segir að áhrif þess að leggja niður handknattleiksdeild Þórs yrðu mjög slæm.

„Ef það yrði gert myndu þessir krakkar ekki fara upp á Brekku [KA-svæðið] til að æfa handbolta. Þau myndu flest hætta í handbolta.“

Bæjarfulltrúi bauðst til að vera aðstoðarþjálfari

Í pistlinum segir Árni einnig að bæjarfulltrúi hafi gert grín að ráðningu Þórs á norður-makedónska þjálfaranum Stevce Alusovski. Ráðningin vakti mikla athygli en áður en Alusovski kom til Þórs þjálfaði hann stórlið Vardar Skopje í Norður-Makedóníu.

„Þetta var úti á bílaplani. Þar hitti ákveðinn bæjarfulltrúi framkvæmdastjóra Þórs og spurði hvað væri í gangi hjá okkur núna, hvort við værum endanlega orðnir ruglaðir. Hann bauðst meira að segja til að koma sem aðstoðarþjálfari ef hann fengi fimm hundruð þúsund kall fyrir það,“ sagði Árni en Þórsarar þáðu ekki þetta boð bæjarfulltrúans.