„Geggjað að skora fyrsta markið sitt fyrir framan nítján þúsund manns“

Alls mættu 18.537 áhorfendur á leikinn sem er langmesti fjöldi sem hefur mætt á leik í sænsku kvennadeildinni. Gamla metið var frá 2008 en þá mættu 9.413 manns á leik Linköping og Umeå.

„Þetta var mjög stór stund, svo sannarlega,“ sagði Berglind í samtali við Vísi í dag.

En hvernig tókst að fá svona marga á völlinn og bæta áhorfendametið um helming?

„Við erum með svakalega stuðningsmenn sem styðja bæði við bakið á karla- og kvennaliðinu. Ákveðið var að spila leikinn á Tele2 vellinum og Hammarby og AIK eru svakalegir erkifjendur. Svo gekk miðasalan fáránlega vel og þetta var draumi líkast vel,“ sagði Berglind.

Kvennalið Hammarby spilar heimaleiki sína á Hammarby IP sem tekur tæplega fjögur þúsund manns í sæti.

„Það er yfirleitt alltaf fullt þar en ég hef ekki enn fengið að upplifa það vegna kórónuveirufaraldursins,“ sagði Berglind.

Hún segir að það hafi verið ólýsanleg tilfinning spila leikinn í gær og hún gleymi þeirri upplifun seint.

„Þetta var magnað. Þegar leikmenn labba í gegnum göngin syngja stuðningsmennirnir alltaf eitthvað Hammarby-lag og allir veifa treflunum sínum. Maður var með gæsahúð og stelpurnar sem eru uppaldar hjá Hammarby voru margar hverjar næstum því farnar að gráta. Þetta var geggjað,“ sagði Berglind.

Hún valdi rétta leikinn til að skora sitt fyrsta mark fyrir Hammarby. Á 63. mínútu kom hún Hammarby í 3-1 með góðu skoti upp í þaknetið. Aðeins sex mínútum áður hafði AIK minnkað muninn í 2-1 svo mark Berglindar var mjög mikilvægt. Hún segir að leikurinn í gær hafi verið hennar besti fyrir Hammarby.

„Jú, algjörlega. Það hefur tekið tíma að komast inn í hlutina. Það er erfitt að koma inn í lið á miðju tímabili. En það gekk vel í þessum leik og geggjað að skora fyrsta markið sitt fyrir framan nítján þúsund manns,“ sagði Berglind en mörkin úr leiknum má sjá hér fyrir neðan.

Eyjakonan gekk í raðir Hammarby frá Le Havre í Frakklandi. Hún hefur leikið sjö leiki fyrir Hammarby síðan hún kom til liðsins um miðjan ágúst. Berglind hafði nokkra kosti í stöðunni í sumar en leist best á Hammarby.

„Þetta heillaði á þessum tíma svo ég ákvað að stökkva á þetta,“ sagði Berglind sem er samningsbundin Hammarby út næsta tímabil. Hún kann vel við sig hjá liðinu.

„Stokkhólmur er frábær borg og mér líður vel hérna,“ sagði Berglind. Hún hefur upplifað eitt og annað á atvinnumannaferlinum en segir vandasamt að bera Hammarby og sænska boltann saman við aðra staði sem hún hefur spilað á.

„Fólk hefur oft spurt mig að þessu en það er ótrúlega erfitt að bera þetta saman. Þetta er allt öðruvísi. En það er gaman að upplifa öðruvísi menningu, spila með mismunandi leikmönnum og mismunandi taktík. Þetta eru algjör forréttindi að fá að upplifa þetta,“ sagði Berglind.

Hammarby er í 5. sæti sænsku úrvalsdeildarinnar með 28 stig þegar þremur umferðum er ólokið. Hammarby er fjórum stigum frá 3. sætinu sem gefur þátttökurétt í Meistaradeild Evrópu á næsta tímabili. Og þangað dreymir Berglindi og stöllum hennar um að komast.

„Markmiðið er enn að reyna að ná Evrópusætinu. Við eigum þrjá leiki eftir, ætlum að vinna þá og vona það besta,“ sagði Berglind.

Hammarby spilar ekki oftar á Tele2 leikvanginum á þessu tímabili en Berglind vonar að það verði reglulegur viðburður, sérstaklega þar sem það lukkaðist svona vel í gær.

„Ég veit ekki hvort þetta er komið til að vera en ég vona það. Fyrst það gekk svona vel að selja miða og fá fólk á völlinn finnst mér að við ættum að fá fleiri leiki á Tele2 vellinum á næsta ári,“ sagði Berglind að lokum.

Sænska úrvalsdeildin er á Stöð 2 Sport en upplýsingar um útsendingar má finna hér. Sænski boltinn er hluti af Stöð 2 Sport Erlent sem kostar 3.990 krónur á mánuði.