Þar var einnig kynnt vefsíðan heilsueflandi.is sem ætluð er fyrirtækjum og stofnunum til að halda utan um heilsueflingu meðal annars með gátlistum. „Gátlistarnir átta ná yfir þau atriði sem rannsóknir sýna að skipti mestu máli varðandi heilsu og vellíðan starfsfólks,“ segir Inga Berg Gísladóttir hjá Embætti Landlæknis.
Hvað er Heilsueflandi vinnustaður?
Verkefnið Heilsueflandi vinnustaður hefur það að markmiði að draga úr líkum á því að fólk falli brott af vinnumarkaði vegna heilsubrests.
Verkefnið er samvinnuverkefni VIRK Starfsendurhæfingarsjóðs, embættis landlæknis og Vinnueftirlitsins en því var formlega hleypt af stokkunum árið 2019.
Skilgreiningin á Heilsueflandi vinnustaður er:
„Heilsueflandi vinnustaður er sá vinnustaður sem hefur sett sér það markmið að stuðla að betri heilsu og vellíðan starfsfólks.“
Eins og áður segir, hafa verið mótaðir átta gátlistar með viðmiðum sem vinnustaðir geta stuðst við.
„Innan margra flokka eru undirflokkar og sem dæmi má nefna að undir stjórnunarháttum eru undirflokkar um skipulag vinnu, stuðning og jafnvægi milli vinnu og einkalífs,“ segir Ingibjörg.
Tíu ólíkir vinnustaðir hafa nú þegar prufukeyrt þessi viðmið frá því snemma árs 2020 auk stofnanna þriggja. Vinnustaðirnir eru: Alta, Efla, Héraðsdómur Reykjavíkur, Hjúkrunarheimilið Uppsalir, Hótel Geysir, Icelandair, Marel, Samband íslenskra sveitarfélaga, Strætó og Þjónustuskrifstofa iðnfélaga.
Gátlistarnir byggja á þeim atriðum sem rannsóknir sýna að skipta mestu máli fyrir vellíðan á vinnustað.
Þar er bæði horft til þeirra atriða sem snúa að starfsmanninum sjálfum, eins og til dæmis hreyfingu eða mataræðis en ekki síður viðmiða sem snúa að stjórnendum.
„Góðir stjórnunarhættir á vinnustað geta jú skipt sköpum fyrir vellíðan starfsfólks og komið í veg fyrir að starfsfólk lendi í veikindum tengt álagi og streitu,“ segir Ingibjörg.
Lítil skref í einu best
Inga segir margt í gátlistum vefsíðunnar heilsueflandi.is ekkert endilega nýtt af nálinni.
„Margt í gátlistunum er nú þegar verið að gera vel víða á vinnustöðum. Vefsvæðið nýtist þannig fyrir vinnustaði til að skoða hvað er nú þegar verið að gera vel á vinnustaðnum tengt heilsueflingu, hvar styrkleikarnir liggja og hvar tækifæri séu til vaxtar,“ segir Inga en bætir við að vefsvæðið geti líka nýst til að fylgjast með þróun á starfi heilsueflingar á vinnustaðnum. „Þannig geta vinnustaðir lagt í þessa vegferð sem heilsueflandi vinnustaður og fylgt henni eftir inn á vefsvæðinu heilsueflandi.is.“
Inga segir mælingar á árangri þó vera á ábyrgð vinnustaða.
Aðspurð um helstu áskoranir vinnustaða sem vilja leggja í það verkefni að efla heilsu starfsfólks, segir Ingibjörg mikilvæga áskorun vera að vinnustaðir ætli sér ekki of mikið á of stuttum tíma.
Heilsueflandi vinnustaður er verkefni sem er hugsað sem langhlaup og sett fram sem verkfæri fyrir vinnustaði til að nýta sér fyrir utanumhald um heilsueflingu og þá er mikilvægt að nota skynsemina og búta fílinn niður,“
segir Ingibjörg.
Eins segir Ingibjörg gott að hafa í huga að vinnustaðir eru jafn fjölbreyttir og þeir eru margir. Þetta þýði að það sem hentar einum vinnustað hentar ekki endilega öðrum.
„Það þarf að taka stutt en markviss skref og eins að hafa í huga að markmiðið er ekki endilega að allir skori á endanum upp í topp í öllum viðmiðunum heldur getur vinnustaður valið sér áherslur í starfinu,“ segir Ingibjörg.
