Grjóthörð Saga Garðars vekur athygli: „Er þetta lánslíkami?“

„Er þetta lánslíkami?“ spyr leikkonan Halldóra Geirharðsdóttir en þær eru samstarfskonur í Borgarleikhúsinu. Saga var þá fljót að svara „nei! Hvað er að þér? Ertu með lánsheila?“ og virtist svarið gleðja fylgjendur hennar á Instagram. 

„Fögur eins sólin heit eins og syndin,“ skrifar Bubbi Morthens. Flestir virðast sammála um að dýrka þessa týpu.

Á Twitter hefur myndinni líka verið deilt víða og ein skrifar þar einfaldlega:

„ertuaðfokkaímérhollllyyyshitttt??!!!“

Aðrar athugasemdir eru til dæmis „Get ekki útskýrt hvernig en þessi ljósmynd breytti lífi mínu“ og „Mikið er ég feginn að vera ekki Stella Blómkvist núna“ og fleira í þeim dúr.

„Jæja Stella Blómkvist, nú ætla ég að drepa þig,“ skrifar Saga sjálf á Twitter.

Í tilkynningu um nýju þættina segir að Stella mæti hættulegri og samviskulausari andstæðingum en hún hefur áður kynnst. Í nýju sýnishorni fyrir aðra þáttaröð af Stellu Blómkvist má sjá Sögu gera Heiðu Reed erfitt fyrir og er nokkuð ljóst að það mun ganga á ýmsu hjá óvinkonunum Myrru og Stellu í þessum þáttum. 

„Við fylgjum sem fyrr eftir andhetjunni, tálkvendinu og lögfræðingnum Stellu Blómkvist, sem fetar sínar eigin slóðir. Í starfi sínu sem lögfræðingur vílar hún ekki fyrir sér að beita brögðum til að fá sínu framgengt og tekur að sér snúin mál þar sem hún sér möguleika á að uppræta spillingu og glæpi hjá einstaklingum í valdastöðum,“ segir um þættina.

„Fyrr en varir sogast hún aftur inn í siðspillta hringiðu glæpa og stjórnmála, þar sem hún neyðist til að takast á við hættulegri og samviskulausari andstæðinga en hún hefur áður kynnst.“

Þættirnir eru sex talsins og eru þeir komnir út. Þeir eru byggðir á samnefndum glæpasögum eftir höfund sem skrifar undir dulnefninu Stella Blómkvist. Fyrsta þáttaröðin var sýnd víða um heiminn, meðal annars í Norður-Ameríku, Bretlandi, Ástralíu, Spáni og Frakklandi.

Sagafilm stendur að baki framleiðslunni en þáttunum er leikstýrt af Óskari Þór Axelssyni og Þóru Hilmarsdóttur. Heiða Rún Sigurðardóttir, einnig þekkt sem Heida Reed fer með hlutverk Stellu sem fyrr en hún sló í gegn í þáttunum Poldark.  Í öðrum hlutverkum eru þau Krístín Þóra Haraldsdóttir, Þorsteinn Guðmundsson, Sara Dögg Ásgeirsdóttir, Jóhannes Haukur Jóhannesson, Edda Björgvinsdóttir, Saga Garðarsdóttir og Halldór Gylfason ásamt mörgum öðrum landsþekktum leikurum.

Handritið er skrifað af Jóhanni Ævari Grímssyni, Snjólaugu Lúðvíksdóttur, Jónasi Margeiri Ingólfssyni og Dóru Jóhannsdóttur. Árni Filippusson og Þór Elíason skutu.