Getur farið yfir 30 metra á sekúndu í hviðum

Búið er að gefa út gula veðurviðvörun vegna vestan hvassviðris á Suðausturlandi frá hádegis og til klukkan 22 í kvöld. Hvassast verður í Mýrdal og við Öræfajökul þar sem gæti farið yfir þrjátíu metra á sekúndu í hviðum. Vindur getur verið varasamur fyrir ökutæki, sérílagi þau sem eru viðkvæm fyrir vindi. Lausamunir geta fokið.

„Vestanáttunum fylgir rigning en þó verður að mestu þurrt og bjart austast. Hiti verður áþekkur síðustu dögum eða á bilinu 7 til 14 stig.

Í kvöld dregur úr vindi og úrkomu en í fyrramálið er von á djúpri og öflugri lægð að landinu og gengur þá í austan og norðaustan 15-23 m/s með rigningu og sums staðar slyddu norðantil. Eftir hádegi snýst í suðavestan 18-25 á sunnan- og austanverðu landinu en einnig dregur úr úrkomu. Aftur dregur úr vindi annað kvöld. Heldur kólnar og verður hitinn á bilinu 4 til 12 stig,“ segir í hugleiðingum veðurfræðings.

Veðurhorfur á landinu næstu daga

Á þriðjudag: Austan og norðaustan 10-20 m/s og rigning, en víða slydda norðantil og snjókoma til fjalla. Snýst í vestan og suðvestan 20-25 m/s og dregur úr úrkomu með suður- og austurströndinni eftir hádegi. Hiti frá 1 stigi norðanlands uppí 12 stig syðst.

Á miðvikudag (haustjafndægur): Vestan og norðvestan 5-13 m/s, en 13-18 með norðausturströndinni. Rigning eða slydda á norðurhelmingi landsins, en úrkomuminna sunnanlands. Hiti frá 1 stigi í innsveitum fyrir norðan, upp í 8 stig með suðurströndinni.

Á fimmtudag: Fremur hæg breytileg átt og víða þurrt og bjart veður, en lítilsháttar rigning sunnantil seinnipartinn. Hiti 1 til 8 stig yfir daginn.

Á föstudag: Breytileg átt, 3-8 m/s og bjartviðri en stöku skúr norðvestantil. Hiti breytist lítið.

Á laugardag: Útlit fyrir hvassa austlæga átt með rigningu eða slyddu. Kalt í veðri. 

Á sunnudag: Líklega ákveðin austlæg átt með rigningu sunnan- og vestantil en bjartviðri norðaustanlands.