Gautaborg setur Kolbein til hliðar

Gautaborg sendi frá sér yfirlýsingu þess efnis í dag. Þar segir að Kolbeinn muni ekki spila né æfa með aðalliði Gautaborgar á meðan mál hans er til skoðunar.

Gautaborg er með mál Kolbeins til rannsóknar innan félagsins og mun svo taka ákvörðun um framtíð hans hjá því.

Tvær konur hafa sakað Kolbein um að hafa beitt þær ofbeldi á skemmtistað í Reykjavík haustið 2017. Hann baðst afsökunar og greiddi þeim miskabætur.

Í yfirlýsingu sem Kolbeinn sendi frá sér á miðvikudaginn sagðist hann segist ekki kannast við að hafa áreitt konurnar. Hegðun hans hafi hins vegar ekki verið til fyrirmyndar.

Þórhildur Gyða Arnarsdóttir steig fram í kvöldfréttum RÚV í síðustu viku þar sem hún greindi frá því að landsliðsmaður í fótbolta hefði beitt sig kynferðislegu ofbeldi haustið 2017. Sættir náðust í málinu en Þórhildi var misboðið þegar Guðni Bergsson, þáverandi formaður KSÍ, sagði við Kastljós að engin kynferðisafbrotamál hefðu komið inn á borð sambandsins.

Guðni sagði af sér sem formaður KSÍ á sunnudaginn. Sama dag ákvað stjórn KSÍ að taka Kolbein út úr landsliðshópnum. Stjórnin sagði svo af sér á mánudaginn og boðaði til aukaþings.

Í gær steig Jóhanna Helga Jensdóttir fram í kvöldfréttum Stöðvar 2 og sagði að Kolbeinn hefði beitt sig ofbeldi sama kvöld og hann réðist á Þórhildi.

Gautaborg hefur fordæmt hegðun Kolbeins og þá vilja hörðustu stuðningsmenn félagsins að það losi sig við hann. Kolbeinn samdi við Gautaborg í janúar á þessu ári.