„Ef ekki á illa fara þá þurfum við að­gerðir, núna“

Þetta kom fram á fundi Pírata þar sem kosningastefna flokksins var kynnt í dag. Þórhildur Sunna segir loftslagsbreytingar, sjálfvirknivæðingu og fjórða iðnbyltingin vera áskoranir samtímans - ekki framtíðar. 

„Við erum komin á þann tímapunkt í sögunni að það þýðir ekki fyrir stjórnmálamenn að tala um framtíðin hitt, framtíðin þetta eða að hún ráðist á miðjunni. Loftslagsbreytingar eru farnar að hafa mikil áhrif. Sjálfvirknivæðingin er hafin. Ef ekki á illa fara þá þurfum við aðgerðir, núna,“ segir Þórhildur Sunna.

Kosningastefna Pírata sem kynnt var hefur fengið yfirskriftina „Lýðræði – ekkert kjaftæði“. Píratar samþykktu kosningastefnu í 24 köflum í sumar, þar sem lýðræðið og valdefling fólks er sagður rauður þráður í gegnum alla stefnuna.

„Stefnan miðar að því að skapa á Íslandi sjálfbært velsældarsamfélag sem hvílir á nýrri stjórnarskrá, hagkerfi framtíðarinnar, sanngjörnum leikreglum og virðingu við náttúru og fólk. Samfélag þar sem fólk hefur raunverulega getu til að taka þátt í lýðræðinu og rödd þess skiptir einhverju máli.

Þetta samfélag hvílir á fimm stoðum, sem Píratar kynntu í dag:

• Efnahagskerfi 21. aldarinnar
• • Ný mælitæki í stað þess að einblína á hagvöxt
  • Mengandi og auðugir bera byrðarnar
  • Öll opinber útgjöld endurskoðuð
  • Hærri persónuafsláttur og dregið úr skerðingum
• Umhverfis- og loftslagshugsun
• • Kolefnishlutleysi árið 2035
  • Ábyrgðin færð á stjórnvöld og mengandi stórfyrirtæki
  • Jákvæðir hvatar til að flýta grænvæðingunni
  • Orku forgangsraðað í þágu smærri notenda
• Nýja stjórnarskráin, auðvitað
• • Ný stjórnarskrá á grundvelli vinnu stjórnlagaráðs
  • Þjóðaratkvæðagreiðsla samhliða þarnæstu kosningum
  • Forsendan fyrir ríkisstjórnarsamstarfi
• Virkar varnir gegn spillingu
• • Efling eftirlitsstofnana og lagaumhverfis
  • Endurskoðun á starfsumhverfi fjölmiðla
  • Aukin vernd fyrir uppljóstrara
  • Rannsóknir á fjárfestingaleið Seðlabankans og spillingu í sjávarútvegi
• Róttækar breytingar í sjávarútvegi
• • Eign þjóðarinnar á auðlindinni staðfest í stjórnarskrá
  • Uppboð á aflaheimildum og frjálsar handfæraveiðar
  • Allur afli í gegnum innlendan markað og verðlagsstofa skiptaverðs lögð niður
  • Refsivert að láta sjómenn taka þátt í kaupum eða leigu útgerða á aflaheimildum.“

Björn Leví Gunnarsson, þingmaður Pírata, sagði á fundinum að allar stefnur miði að sjálfbæru velsældarsamfélagi þar sem grunnþörfum allra sé mætt. 

„Grundvöllur velsældar í framtíðinni verður öflugt nýsköpunarumhverfi þar sem Píratar leggja fram aðgerðaráætlun í 20 liðum. Öruggt húsnæði, öflugt menntakerfi, hágæða heilbrigðiskerfi og lýðræði - ekkert kjaftæði - eru máttarstólpar hins sjálfbæra framtíðarsamfélags sem við Píratar ætlum að skapa.“

Í tilkynningu frá flokknum segir að Björn Leví hafi jafnframt tiltekið nokkur atriði sem finna megi í framtíðarsýn Pírata:

• Nýtt og framsækið menntakerfi sem byggir á námsstyrkjum.
• Uppstokkun og uppbygging á húsnæðismarkaði og sterkari staða leigjenda
• Nýr tónn í útlendingamálum og Útlendingastofnun lögð niður
• Dregið úr skerðingum í stuðningskerfunum þangað til þær hverfa endanlega
• Gjaldfrjáls heilbrigðisþjónustu og þvingunarlaus og valdeflandi geðheilbrigðisþjónustu.
• Hætt að refsa vímuefnanotendum og skaðaminnkandi aðferðir í stað bannstefnu.
• Nýsköpunarlandið Ísland sem getur tekist á við loftslagsbreytingar, sjálfvirknivæðingu og fjórðu iðnbyltinguna.