Framsókn segir framtíðina ráðast á miðjunni

Í tilkynningu um stefnumál flokksins á næsta kjörtímabili segir Framsókn að hið opinbera skuli geta komið til móts við fólk á þeirra eigin forsendum, gefa því fjölbreytt tækifæri til að þroska hæfileika sína, skapa verðmæti og taka sem virkastan þátt í samfélaginu eftir þeirra möguleikum. Það sé best fyrir alla ef hver og einn leggur sig fram.

Þá segir að Framsókn leggi áherslu á að vinna áfram að því að samfélagið þróist hratt í eðlilegt horf eftir heimsfaraldur Covid-19 en undirstrikar að vernda verði viðkvæmustu hópana.

Stefnumál Framsóknarflokksins skiptast í tvo meginflokka samkvæmt tilkynningu. Annars vegar flokkinn „Fjárfestum í fólki“ og hins vegar flokkinn „Atvinnu- og efnahagslífið eftir heimsfaraldur.“

Heilbrigðisþjónustan – Einstaklingurinn í öndvegi

Framsókn vilji fara í almennar aðgerðir til þess að fjárfesta í fólki til framtíðar. Fyrsti liðurinn í þeirri aðgerðaráætlun sé að einstaklingurinn sé í öndvegi í heilbrigðismálum. 

Framsókn segir að fara þurfi í markvissa vinnu við að endurmeta og samþætta þjónustu við fólk sem hefur lent í áföllum á lífsleiðinni.

Framsókn vilji fara í þjóðarátak í lýðheilsutengdum forvörnum til að efla einstaklinga til virkni og velgengni í íslensku samfélagi. Það sé þýðingarmikil fjárfesting í fólki.

Þá segir að Framsókn vilji að skoðað verði hvort frekari tilefni sé til aukins einkareksturs innan heilbrigðisgeirans. Það þurfi einfaldlega að nota þær aðferðir sem skila bestum árangri á sem skjótasta máta.

Réttindi barna - Þjónustutrygging og jafnræði í þjónustu við börn

Framsókn segist ætla að tryggja að öll börn njóti sömu réttinda til opinberrar þjónustu í anda nýrrar löggjafar um samþættingu þjónustu í þágu farsældar barna sem muni fækka alvarlegum tilvikum.

Eitt flóknasta viðfangsefni íslenskra stjórnvalda síðustu áratugi sé sú staðreynd að börn hér á landi þurfi oft að bíða óhóflega lengi eftir greiningu eða þjónustu við mögulegum vanda.

Framsókn ætli að stytta biðlista eftir greiningarúrræðum, svo sem einhverfu, taugaþroskaröskunum, þroskahömlunum, geðrænum vanda, með því að fjölga sérhæfðu starfsfólki og grípa fyrr inn í aðstæður barns til að koma í veg fyrir alvarlegan vanda.

Framsókn vilji að barnið sé ávallt í forgangi. Framsókn vilji að komið verði á þjónustutryggingu, sem þýðir að ef einstaklingur fær ekki heilbrigðis- eða félagsþjónustu hjá hinu opinbera sé honum vísað til einkaaðila, samanber danska módelið.

Þá vilji flokkurinn styðja foreldra með því að brúa bilið milli fæðingarorlofs og leikskóla. Þá vilji Framsókn tryggja styrki til foreldra sem ekki eru með börn hjá dagforeldri. 

Framsókn vilji jafnframt að öll réttindi sem tengist fullorðinsaldri verði virk við átján ára aldur.

Sókn í þágu eldra fólks - Aldur skiptir ekki máli, heldur einstaklingurinn

Framsókn segist vilja afnema reglur um að fólk fari á eftirlaun eða hætti störfum á ákveðnum aldri. Þeir sem vilji halda áfram að vinna eigi að hafa kost á því. Þá sé lögð áhersla á að málalfokkur eldra fólks verði endurskipulagður út frá grunngildum aldursvæns samfélags, samþættingu, persónumiðaðri þjónustu og skýrrar sýnar á hlutverk og skyldur þeirra sem að þjónustu við eldra fólk koma. 

Nútímavæða þurfi þjónustu og aðgengi að henni með aukinni notkun á velferðartækni, rafrænni þjónustu, fjarþjónustu og upplýsingagáttum. Lögð sé áhersla hjá Framsókn að upplýsingakerfi verði samræmd og byggð verði upp öflug upplýsingagátt. 

Þá sé lögð áhersla á að almenna frítekjumarkið hækki í skrefum og að lífeyrisskerðingar vegna atvinnutekna verði afnumdar. Framsókn vilji mæta þeim verst stöddu og horfi sérstaklega til húsnæðismála. Skoða þurfi möguleika á hlutdeildarlánum fyrir eldra fólk.

Örorka - Allir þurfa þak yfir höfuðið

Framsókn segir að heildarendurskoðun á málefnum öryrkja hér á landi sé nauðsynleg. Endurskoðunin verði gerði með þau markmið að bæta stöðu öryrkja og virkni þeirra innan samfélagsins og vinnumarkaðarins. 

Þá vilji flokkurinn aðstoða öryrkja við að komast í vinnu og koma húsnæðisátaki á kjölinn sem aðstoði öryrkja við að hafa tryggt þak yfir höfuðið. 

Húsnæðismál - Aukið framboð

Í stefnuskrá flokksins kemur fram að hann vilji að skipulags- og húsnæðismál séu í sama ráðuneyti til að auka skilvirkni þegar kemur að skipulagsmálum sveitarfélaga. Þá vilji flokurinn auka framboð á almennum íbúðum fyrir öryrkja og fatlaða og útfæra hlutdeildarlán fyrir fleiri hópa en fyrstu kaupendur. 

Þá sé lögð áhersla á að umsóknargátt almennra og sérstakra húsnæðisbóta sé samræmd og farið verði í heildarendurskoðun á húsnæðismálum með það að leiðarljósi að finna leiðir til að hjálpa þeim verst stöddu. 

Fjórða stoðin - Fjölþættari verðmætasköpun

Framsókn vilji efla efnahagslífið til að skjóta fleiri stoðum undir innlenda verðmætasköpun svo sem uppbyggingu í skapandi greinum. Framsókn vilji efla kvikmyndagerð á Íslandi og hækka endurgreiðslur á kostnaði við kvikmyndagerð hérlendis í 35 prósent. 

Framsókn vilji þá hvetja til enn frekari fjárfestinga í hugverkaiðnaði, svo sem líftækni, lyfjaframleiðslu og öðrum tengdum greinum með fjárfestingarstuðningi við stærri verkefni sem skapa verðmæti og störf fyrir þjóðina. 

Loftslagsmál - græn orka - tækifæri Íslands 

Framsóknarflokkurinn segist vilja efla grænan iðnað hér á landi og nýta tækifærin í landinu til nýsköpunar, þróunar og verðmætasköpunar í loftslagsmálum. Þá telji flokkurinn veruleg tækifæri liggja í útflutningi á þekkingu í formi ráðgjafar og fjárfestinga á erlendum vettvangi. 

Flokkurin telji jafnframt að koma þurfi á sérstöku lotslagsráðuneyti til að gera verkefni markvissari og skilvirkari. Stefnan sé að Ísland verði kolefnislaust árið 2040. Stuðla þurfi að hringrásarhagkerfi í íslensku samfélagi og atvinnulífi. 

Samgöngumál - innviðir verðmætasköpunar

Framsóknarflokkurinn segist vilja halda áfram uppbyggingu í samgöngum, með því að fækka einbreiðum brúm á hringveginum og halda áfram að aðskilja aksturstefnur á umferðarþyngstu vegköflum landsins. Vegalengdir verði þá jafnframt styttar milli byggðar, atvinnusvæði á landinu öllu verði efld og dregið verði markvisst úr losum gróðurhúsalofttegunda. 

Flokkurinn vilji halda áfram að styrkja og efla innanlandsflugvelli, lögð verði áhersla á uppbyggingu hafna og að á hverjum tíma sé alltaf unnið að byggingu aðminnsta kosti einna jarðganga á landinu. 

Byggðamál - við erum eitt samfélag

Framsókn segist vilja beita fjárhagslegum hvötum til að bæta aðgengi að opinberri þjónustu við íbúa á brothættum svæðum á landsbyggðinni til að jafna aðstöðumun. Fjármagn erði aukið til byggðaáætlunar og eigið fé Byggðastofnunar verði jafnframt aukið til að auka möguleika stofnunarinnar á að styðja við atvinnuuppbyggingu og nýsköpun á landsbyggðinni. 

Flokkurinn telur mikilvægt að regluverk um fiskeldi verði endurskoðað til að tryggja sanngjarna gjaldtöku fyrir afnot af sameiginlegum auðlindum. Starfsemi fiskeldis hafi þó hleypt nýjum krafti í byggðir sem áður stóðu höllum fæti og vilji flokkurinn því áframhaldandi stuðning við uppbyggingu fiskeldis. 

Landbúnaður - vanmetin auðlind

Flokkurinn segist leggja mikla áherslu á að nýsköpun í matvælaframleiðslu og landnýtingu verði stórefld. Stefna beri að því að öll landnýting og ræktun verði sjálfbær og stuðningur hins opinbera þurfi að beinast að þvi að efla fjölbreytta ræktun og landnýtingu, þar með talið kolefnisbindingu. 

Endurskoða þurfi tollasamning við ESB vegna forsendubrests meðal annars eftir útgöngu Bretlands úr sambandinu. Þá þurfi að efla tolleftirlit verulega. Stofna þurfi nýtt landbúnaðar- og matvælaráðuneyti þar sem skógrækt og landgræðsla komi saman við eftirlitsstofnanir matvælaöryggis og landbúnaðar. 

Kosningastefnu Framsóknarflokksins má sjá í heild sinni á vef flokksins.