Veirunni sama hvað þú skrifar margar til­finningar í dag­bók

„Það fer enginn grafgötur með að Naglinn er heilsumelur per exelans og hugsar um hreyfingu, mataræði, andlega heilsu eins og sjáaldur auga síns og hefur nöldrað um dásemdir heilsulífsins á lendum internetsins síðan 2005,“ skrifar Ragga í færslu á Facebook-síðu sinni.

Í færslunni segir Ragga frá því að hún hafi stundað líkamsrækt frá árinu 1998 og að hún innbyrði nánast eingöngu óunninn mat. Þá kveðst hún fasta í 12-14 tíma og drekka minnst þrjá lítra af vatni á dag.

D-vítamín, C-vítamín, fjölvítamín, fiskiolía og göngutúrar eru einnig hluti af daglegri rútínu Röggu og segist hún sofa í 8-9 tíma á hverri nóttu.

„Naglinn verður seint kölluð kyrrsetumanneskja og hjólar og labbar á milli staða hér í Kaupmannahöfn og tekur reglulega öndunaræfingar. Naglinn reynir að vera trú sjálfri sér og gríðarlega félagslynd með stóran vinahóp af jákvæðu fólki í kringum sig. Naglinn er með ónæmiskerfi á við Kínamúrinn og hristir af sér pestir og kvef eins og teflon panna.“

Það er því óhætt að segja að Ragga hugi afar vel að öllum hliðum heilsunar og hafi gert í mörg ár. Þrátt fyrir það smitaðist hún af kórónuveirunni í apríl á þessu ári.

„Rónan spyr ekki um stétt né stöðu. Aldur né útlit. Hreysti né heilsu. Núvitund eða Crossfit. ALLIR geta smitast af COVID.... alveg sama hvað þeir gúlla mikið af bætiefnum, sofa mikið eða skrifa margar tilfinningar í dagbók.“

Ragga segir að þrátt fyrir að hafa smitast af veirunni, hafi hún einnig látið bólusetja sig.

„Því Naglinn vill vernda náungann. Því við erum öll í þessari baráttu saman. Því við berum öll ábyrgð,“ skrifar Ragga í lok færslunnar.

Athafnamaðurinn og áhrifavaldurinn, Nökkvi Fjalar Orrason greindi frá því að hann treysti á heilbrigt líferni og öflugt ónæmiskerfi sem vörn gegn kórónuveirunni í stað bólusetningar. 

Óhætt er að segja að ákvörðun Nökkva hafi verið kveikja að mikilli umræðu. Kári Stefánsson, forstjóri Íslenskrar erfðagreiningar sagði í þættinum Pallborðið á Vísi, að honum þætti Nökkvi hafa talað óvarlega. Líkamsrækt, dagbókarskrif og köld böð myndu ekki koma í veg fyrir smit.