Hagnaður stærsta olíuframleiðanda heims nærri þrefaldaðist

Eiður Þór Árnason skrifar 9. ágúst 2021 13:10

Kórónuveirufaraldurinn og sóttvarnatakmarkanir stjórnvalda hefur haft mikil áhrif á olíuvinnslu og hag olíufyrirtækja. Getty/Maksim Safaniuk

Hagnaður sádiarabíska gas- og olíufyrirtækisins Aramco nærri þrefaldaðist á öðrum ársfjórðungi á sama tíma og eftirspurn eftir olíu tók við sér á heimsvísu.

Stjórnendur þessa stærsta olíuframleiðanda heims segja að aflétting sóttvarnatakmarkanna, bólusetning, efnahagsaðgerðir stjórnvalda og endurreisn hagkerfa skýri viðsnúninginn í rekstri félagsins.

Eftirspurn eftir olíu dróst mikið saman snemma í kórónuveirufaraldrinum en verð á hráolíu hefur nú hækkað um yfir 30 prósent frá ársbyrjun 2021. Hafa olíurisar heimsins ekki farið varhluta af þessari þróun.

Hagnaður Aramco jókst um um 288 prósent á öðrum ársfjórðungi 2021 samanborið við sama tíma í fyrra og nam 25,5 milljörðum Bandaríkjadala. Jafngildir það um 3.215 milljörðum íslenskra króna. Hagnaður fyrirtækisins jókst um 30 prósent á fyrsta ársfjórðungi þessa árs.

Fleiri olíufyrirtæki sýnt sterkan viðsnúning

Amin Nasser, forstjóri fyrirtækisins segir að fjárhagsniðurstöðurnar endurspegli kröftuga viðspyrnu í eftirspurn eftir olíu. Armco er ekki eina orkufyrirtækið sem hefur nýverið birt sterkar fjárhagsniðurstöður á sama tíma og borið hefur á batamerkjum í heimshagkerfinu.

Í síðasta mánuði tilkynnti bandaríski orkurisinn Exxon Mobil að hagnaður fyrirtækisins hafi numið 4,7 milljörðum Bandaríkjadala á öðrum ársfjórðungi samanborið við yfir eins milljarða tap á sama tímabili í fyrra. Þá greindi evrópska fyrirtækið Royal Dutch Shell nýverið frá hæsta ársfjórðungshagnaði sínum í yfir tvö ár.

Verðið á Brent-hráolíu hefur hækkað í um 70 Bandaríkjadali eftir að samtök olíuútflutningsríkja (Opec+) ákváðu að draga úr olíuframleiðslu. Félag breskra bifreiðaeigenda (RAC) sagði í síðustu viku að bensínverð þar í landi hafi ekki verið jafn hátt í átta ár í kjölfar níu mánaða verðhækkana.

Bensín og olía Sádi-Arabía

Tengdar fréttir

Olíuiðnaðurinn aldrei upplifað annað eins áfall og nú

Öll spjót standa nú á olíuiðnaðinum sem hefur aldrei upplifað annað eins áfall og nú vegna kórónuveiruheimsfaraldursins. Alþjóðaorkumálastofnunin varar við því að áhrifin á sum viðkvæm olíuútflutningsríki eigi eftir að verða alvarleg.

2. apríl 2020 11:14

Sádar boða enn meiri olíuframleiðslu í verðstríði við Rússa

Útlit er fyrir enn frekari lækkun á heimsmarkaðsverði á olíu eftir að Sádar tilkynntu að þeir ætluðu að framleiða metmagn af olíu í apríl. Þeir standa nú í verðstríði við Rússa sem vildu ekki samþykkja samdrátt í framleiðslu sem Sádar og OPEC vilja til að bregðast við áhrifum kórónuveirunnar.

10. mars 2020 16:41

Mest lesið

Fleiri fréttir