Mark Gary Martin dugði skammt í Eyjum

Gary Martin bar fyrirliðabandið í liði Selfyssinga sem heimsóttu Vestmannaeyja, en mikið gustaði um Martin í kringum brottför hans frá Eyjum í vor, þar sem samningi hans við Eyjamenn var slitið.

Það byrjaði hins vegar betur fyrir Vestmannaeyinga í dag þar sem Spánverjinn Sito kom liðinu í forystu eftir aðeins þriggja mínútna leik. Gary Martin jafnaði hins vegar fyrir Selfoss á 11. mínútu leiksins áður en Sito kom ÍBV yfir á ný stundarfjórðungi síðar. Eyjamenn fengu svo tækifæri til að tvöfalda forystu sína undir lok hálfleiksins en Stefán Þór Ágústsson, markvörður Eyjamanna, varði þá vítaspyrnu Guðjóns Péturs Lýðssonar.

Eyjamönnum refsaðist fyrir það klúður þar sem Aron Einarsson jafnaði fyrir Selfyssinga eftir fimm mínútna leik í síðari hálfleik, staðan 2-2. Guðjón Pétur hafði þó ekki sagt sitt síðasta og bætti upp fyrir vítaklúðrið þegar hann skoraði sigurmark Eyjamanna á 72. mínútu

Eyjamenn halda öðru sæti deildarinnar með sigrinum en þeir eru nú með 19 stig. Grindvíkingar voru þeim jafnir að stigum fyrir umferðina en leikur Grindavíkur við topplið Fram stendur yfir. Fram er var með 24 stig, fullt hús stiga, fyrir kvöldið. Selfoss er með átta stig í tíunda sæti, fjórum stigum á undan Þrótti Reykjavík sem mætir botnliði Víkings frá Ólafsvík í kvöld.

Jafnt fyrir norðan

Norðan heiða tóku Þórsarar á móti Vestra, en aðeins tvö stig aðskildu liðin í töflunni, Vestramönnum í hag, sem sátu í sjötta sæti en Þórsarar í því sjöunda.

Benedikt V. Warén kom Vestra yfir á 32. mínútu og 1-0 stóð í leikhléi. Þannig stóð raunar allt fram á 86. Mínútu þegar Bjarki Már Viðarsson jafnaði fyrir heimamenn og tryggði þeim með því stig.

1-1 jafntefli liðanna þýðir að þau halda sínum stað í töflunni. Vestri er í sjötta sætinu með 13 stig en Þór sæti neðar með 12 stig.