Amanda „framtíðarleikmaður fyrir okkur ef hún velur rétt“

Amanda er aðeins 17 ára en hefur byrjað fyrstu tvo leiki tímabilsins í norsku úrvalsdeildinni með meistaraliði Vålerenga. Hún varði fyrstu árum ævinnar í Noregi þar sem faðir hennar, Andri Sigþórsson, lauk sínum knattspyrnuferli með liði Molde. Móðir Amöndu er hin norska Anna Angvik Jacobsen.

Amanda flutti fimm ára gömul til Íslands og lék með yngri flokkum Víkings og Vals hér á landi. Hún hefur leikið 12 leiki með yngri landsliðum Íslands og skorað í þeim 10 mörk en einnig haldið tengslum við Noreg og æfði til að mynda með Vålerenga um tíma þegar hún var 13 og 14 ára gömul. Amanda flutti til Danmerkur í fyrra og gekk í raðir Nordsjælland en þaðan fór hún svo til norsku meistaranna undir lok síðasta árs.

Knattspyrnufólk má aðeins leika fyrir eitt A-landslið á sínum ferli. Um leið og Amanda spilar mótsleik fyrir Noreg eða Ísland verður því ekki aftur snúið. Næstu mótsleikir A-landsliðanna eru hins vegar ekki fyrr en í undankeppni HM í haust.

Þorsteinn valdi í gær 23 A-landsliðskonur til að mæta Írlandi í vináttulandsleikjum 11. og 15. júní á Laugardalsvelli en Amanda er ekki í þeim hópi.

„Ég hef ekki verið í sambandi við hana nýlega. Ég talaði við hana í febrúar eða mars. Ég fylgist með öllum leikjum og hún var klárlega ein þeirra sem komu til greina núna. Ég taldi þó ekki rétta tímapunktinn til að velja hana í dag en hún er klárlega áfram inni í myndinni, og framtíðarleikmaður fyrir okkur ef hún velur rétt,“ segir Þorsteinn.

Hefði ekki getað æft með íslenska U19-liðinu

Þórður Þórðarson, sem KSÍ greindi frá í gær að myndi í sumar hætta sem þjálfari U19-landsliðs kvenna, valdi Amöndu ekki í æfingahóp sem kemur saman á Selfossi 7.-10. júní. Þorsteinn segir eðlilegar skýringar á því þar sem að vegna kórónuveirufaraldursins hefði það ekki gengið upp.

Amanda þarf hins vegar ekki að fara yfir nein landamæri til að æfa með U19-landsliði Noregs sem æfir saman 8.-15. júní. Þorsteinn segist ekki vita hvert hugur Amöndu stendur varðandi framtíðina:

„Ég veit það ekki. Ég hef ekki talað við hana í rúma tvo mánuði. En varðandi U19-liðið og af hverju hún var ekki valin í okkar U19-lið þá var bara um að ræða 3-4 daga æfingatörn hér heima, og hún hefði þurft að fara í fimm daga sóttkví við komuna til landsins því að U19-liðið verður ekki í búblu. Æfingunum hefði því verið lokið þegar hún losnaði úr sóttkví. Það var nú helsta ástæðan held ég fyrir því að þetta gekk ekki upp.

Að sjálfsögðu viljum við ekki missa svona leikmann. Ég ákvað bara að velja hana ekki í A-landsliðið núna og ég verð bara að standa og falla með því,“ segir Þorsteinn en viðtal við hann má sjá hér að ofan.