Sólmyrkvi sjáanlegur á öllu landinu í næstu viku

Þetta verður mesti sómyrkvi sem sést hefur frá Íslandi frá því í mars árið 2015. Þá huldi tunglið hins vegar mun meira af sólinni, 97%.

Í höfuðborginni hefst deildarmyrkvinn klukkan 9:06 að morgni þegar tunglið byrjar að ganga inn fyrir skífu sólarinnar á himninum. Myrkvinn nær hámarki klukkan 10:17 og verður hann aðeins meiri séð frá vestanverðu landinu en austanverðu. Á Austurlandi skyggir tunglið á 66% sólarinnar, að því er kemur fram á Stjörnufræðivefnum.

Myrkvanum lýkur klukkan 11:33 í Reyjavík en tímasetningarnar eru örlítið mismunandi fyrir mismunandi staði á landinu. Til að berja myrkvann augum þarf hlífðarbúnað eins og sólmyrkvagleraugu eða logsuðugler af mesta styrkleika.

Sólmyrkvar sem þessi verða þegar tunglið gengur á milli sólar og jarðar. Vestan við Ísland verður svonefndur hringmyrkvi en þeir verða þegar tunglið er aðeins of langt frá jörðinni til þess að hylja alla skífu sólarinnar. Þá sést þunnur ljóshringur í kringum tunglið. Hringmyrkvi gengur yfir Kanada, Grænland, norðurpólinn og Rússland en heppilegasti staðurinn til að berja hann augum er nyrst á Grænlandi.

Fimm ár eru þar til almyrkvi sést á sólu frá Íslandi, 12. ágúst 2026. Það verður fyrsti almyrkvi sem sést frá Íslandi frá 1954 og sá fyrsti sem sést frá Reykjavík frá 17. júní árið 1433.

Tímasetningar fyrir einstaka staði á Íslandi (námundað að næstu heilu mínútu):

Reykjavík 69%

Myrkvi hefst: 09:06

Myrkvi í hámarki: 10:17

Myrkva lýkur: 11:33

Stykkishólmur 71%

Myrkvi hefst: 09:08

Myrkvi í hámarki: 10:19

Myrkva lýkur: 11:34

Ísafjörður 73%

Myrkvi hefst: 09:09

Myrkvi í hámarki: 10:20

Myrkva lýkur: 11:36

Akureyri 69%

Myrkvi hefst: 09:11

Myrkvi í hámarki: 10:23

Myrkva lýkur: 11:38

Egilsstaðir 66%

Myrkvi hefst: 09:12

Myrkvi í hámarki: 10:24

Myrkva lýkur: 11:41

Höfn í Hornafirði 65%

Myrkvi hefst: 09:10

Myrkvi í hámarki: 10:22

Myrkva lýkur: 11:38