Innlent

Hraunið byrjað að banka upp á báða varnargarðana

Kristján Már Unnarsson skrifar
Hörn Hrafnsdóttir, umhverfis- og byggingarverkfræðingur hjá Verkís, við eystri varnargarðinn í syðri Meradal í dag.
Hörn Hrafnsdóttir, umhverfis- og byggingarverkfræðingur hjá Verkís, við eystri varnargarðinn í syðri Meradal í dag. Egill Aðalsteinsson

Almannavarnir vilja að strax verði farið í að hækka varnargarða á gosstöðvunum upp í átta metra hæð. Sérfræðingur telur að garðarnir muni að minnsta kosti tefja fyrir því að hraunið steypist niður í Nátthaga og þar með í átt að Suðurstrandarvegi.

Í fréttum Stöðvar 2 mátti sjá jarðýtu og skurðgröfu á lokametrunum að byggja upp eystri varnargarðinn í Meradal syðri í dag.

Varnargarðarnir náðu báðir fjögurra metra hæð í dag. Á morgun verður ákveðið hvort haldið verði áfram og þeir hækkaðir upp í átta metra hæð.KMU

„Það gengur alveg ljómandi vel, eins og þú sérð. Við erum alveg að nálgast það að komast upp í fjóra metrana,“ sagði Hörn Hrafnsdóttir, umhverfis- og byggingarverkfræðingur hjá Verkís, sem stýrði gerð varnargarðanna á staðnum í dag.

Hraunrennslið frá gígnum í dag var til þriggja átta; inn í Meradalina báða en einnig inn í Geldingadali.

„Hraunið er að streyma fram. Það er að byggja upp þrýsting. Svo er þetta bara spurning hvar þetta finnur veikleika hverju sinni.“

Hraunið rann niður í þrjá dali í dag. Til vinstri sjást Geldingadalir og til hægri Meradalir, sá nyrðri fjær en sá syðri nær. Varnargarðarnir tveir sjást neðst hægramegin.Egill Aðalsteinsson

Vestanmegin í dalnum er hraunið þegar farið að hrynja yfir fyrsta neyðargarðinn og byrja að banka upp á báða garðana.

„Já, það er algerlega farið að banka upp á. Við máttum ekki byrja seinna en við gerðum,“ segir Hörn.

En menn vilja veigameiri garða og í dag lögðu Almannavarnir til að farið yrði með þá upp í átta metra hæð. Starfshópur ráðuneytisstjóra um vernd innviða vegna eldgossins á lokaorðið á fundi í fyrramálið.

Frá vinnu við eystri varnargarðinn í dag.Egill Aðalsteinsson

„Ef það kemur grænt ljós þá á morgun þá býst ég við að það verði bara byrjað á því annaðhvort á morgun eða hinn.“

Einar Jónsson ýtustjóri vill ennþá stærri garða.

„Tuttugu metra í viðbót.“

-En heldurðu að hraunið muni ekki á endanum fara yfir samt sem áður og sigra mannanna verk?“

„Þá er bara að byrja aftur. Halda áfram upp,“ svarar Einar og hlær.

Einar Jónsson ýtustjóri.Egill Aðalsteinsson

„Þetta mun alveg örugglega tefja fyrir hrauninu. En hversu lengi.. - það er svolítið tilraunakennt hvað þetta heldur lengi,“ segir Hörn.

Þetta sé þó innlegg í reynslubankann.

„Ef þetta gengur eftir, sem okkar fræðingar segja, að nú sé Reykjanesið vaknað, þá kannski vitum við aðeins meira um hvernig á að bregðast við þegar þetta kemur aftur upp á fleiri stöðum,“ segir Hörn.

Varnargarðarnir girða fyrir gilin niður í Nátthaga.Egill Aðalsteinsson

Ekki er að sjá neitt lát á gosinu. Kvikustrókar fara hátt til himins með miklum drunum en þess á milli dettur allt niður í dúnalogn. Takturinn í gígnum er eiginlega furðujafn. Hann er að gjósa á þetta fimm til átta mínútna fresti, rétt eins og goshverinn Strokkur.

„Svo er að brotna úr gígnum hérna vinstra megin, það gerði það í gær,“ segir Einar ýtustjóri.

Gosstrókarnir ná gríðarlegri hæð. Aðalútsýnisstaður göngufólks er á hryggnum vinstra megin.KMU

Hann er sannarlega á ævintýralegum vinnustað þessa dagana, vinnandi í kappi við hraunrennslið með eldspúandi gíginn í bakgrunni.

„Þetta er flottur vinnustaður,“ segir hann.

-Þú hefur aldrei verið í svona áður?

„Nei, ekki svona,“ svarar hann og hlær.“

Hér má sjá frétt Stöðvar 2:

Hér má sjá eldgosið í beinni útsendingu Vísis:

Eldgos í Fagradalsfjalli Almannavarnir Grindavík

Tengdar fréttir

Versta brekkan orðin breiður göngustígur

Aðalgönguleiðin að gosstöðvunum í Fagradalsfjalli, svokölluð A-leið, er núna orðin mun greiðfærari og hættuminni en áður. Leiðin var lokuð í gær meðan unnið var að framkvæmdum en opnuð á ný í gærkvöldi.

Hérna vilja Almannavarnir ekki missa hraunið lengra

Eldgosið í Fagradalsfjalli er núna tvöfalt öflugra en það hefur lengst af verið, samkvæmt nýjum mælingum Jarðvísindastofnunar. Almannavarnir eru í viðbragðsstöðu með að láta ryðja upp varnargörðum til að hindra að hraunrennsli fari í Nátthaga og ógni þar með Suðurstrandarvegi.

Telja varnar­garða ekki mega bíða lengi

Fannar Jónasson bæjarstjóri Grindavíkur segir áhyggjuefni ef hrauntaumur rennur niður í Nátthaga og heldur þaðan áfram í átt að Suðurstrandarvegi. Bæjarráð Grindavíkur ályktaði í síðustu viku um það að gera þyrfti allt sem mögulegt væri til þess að hefta framrás hraunsins niður í Nátthaga og hefur nú þegar verið ráðist í hönnun á þess til gerðum mannvirkjum.

Mest lesið


Fleiri fréttir

Sjá meira


×

Mest lesið