Fjórum samstarfsáætlunum ESB verður hleypt af stokkunum í dag í beinni á Vísi

Ný tækifæri í Evrópusamstarfi verða kynnt í beinni útsendingu Rannís frá Borgarleikhúsinu í dag milli klukkan 14 og 16. Rannís hefur umsjón með samstarfinu hér á landi og má fylgjast með útsendingunni á www.rannis.is og hér á Vísi. 

Kynnir og stjórnandi er Bergur Ebbi Benediktsson.

Á opnunarhátíðinni verður fjórum samstarfsáætlunum ESB til næstu sjö ára hleypt af stokkunum: 

• Horizon Europe rannsókna- og nýsköpunaráætlun, 
• Erasmus+ mennta-, æskulýðs- og íþróttaáætlun, 
• European Solidarity Corps fyrir samfélags- og sjálfboðaverkefni 
• Creative Europe kvikmynda- og menningaráætlun 

Kynntar verða helstu nýjungar og tækifæri auk þess sem litið verður um öxl og spjallað við íslenska þátttakendur. Dagskrá hátíðarinnar má finna hér fyrir neðan. Í spilaranum hér fyrir neðan verður hægt að fylgjast með beinni útsendingu.

Í fréttatilkynningu segir nánar um verkefnin:

Styrkir til rannsókna og nýsköpunar

Horizon Europe er ný áætlun á sviði rannsókna og nýsköpunar og verður rúmlega 95 milljörðum evra ráðstafað í styrki til þátttökulanda hennar. Áhersla verður lögð á að styðja við framúrskarandi vísindarannsóknir auk þess sem möguleikar nýsköpunarfyrirtækja aukast til muna. Styrkir verða veittir til rannsókna sem miða að því að taka á helstu áskorunum sem samfélög Evrópu standa frammi fyrir, svo sem á sviði heilbrigðis, umhverfis og orkumála. Markmiðið er að styrkja samkeppnishæfni Evrópu á þessum sviðum og styður áætlunin við allar greinar rannsókna og nýsköpunar; hug- og félagsvísindi jafnt sem raunvísindi og tækniþróun.

Menntun, æskulýðsmál og íþróttir

Erasmus+ nær yfir fjölmörg tækifæri og styrkjamöguleika á sviði menntunar, æskulýðsmála og íþrótta. Framlög til Erasmus+ verða rúmir 26 milljarðar evra, sem er nærri 50% meira en í fyrri áætlun. Áætlað er að 10 milljónir Evrópubúa muni njóta góðs af þátttöku í Erasmus+ næstu sjö árin, þar af allt að 10.000 Íslendingar, en íslenskir aðilar hafa tekið virkan þátt í menntaáætlunum ESB allt frá 1992. Erasmus+ veitir ekki einungis ný tækifæri til að fara í nám og þjálfun erlendis og til samstarfs um þróun menntunar og nýsköpun í starfi heldur opnar fleirum möguleika á þátttöku en nokkru sinni fyrr. Áhersla verður lögð á inngildingu og jöfn tækifæri fyrir alla, auk þess sem grænar og stafrænar lausnir munu vera í forgangi.

Evrópskt samstarf skapandi greina

Creative Europe styður við samstarf á sviði menningar og skapandi greina og tekur áætlunin m.a. til menningar, kvikmynda, sjónvarpsefnis, bókmennta og menningararfs, en á tímabilinu 2021-2027 veitir ESB um 2,4 milljörðum evra til málaflokksins sem er um 40% aukning frá fyrri áætlun. Því er til mikils að vinna fyrir íslenskan menningargeira, en Ísland hefur staðið sig einkar vel í Creative Europe frá upphafi.

Samfélagsverkefni og sjálfboðastarf ungs fólks

Nýjasta samstarfsáætlunin sem Rannís kynnir er European Solidarity Corps sem gefur ungu fólki á aldrinum 18-30 ára tækifæri til að starfa að samfélagsverkefnum og taka þátt í sjálfboðastarfi um alla Evrópu og víðar. Áætlunin mun hafa 1 milljarð evra til úthlutunar næstu sjö árin og verður spennandi að kynna tækifærin fyrir ungu fólki á Íslandi.

Dagskrá hátíðarinnar

• Opnunarávarp: Lilja Dögg Alfreðsdóttir, mennta- og menningarmálaráðherra.
• Ávarp frá ESB: Adrienn Kiraly skrifstofustjóri framkvæmdastjóra rannsókna, nýsköpunar, menntunar, menningar og æskulýðsmála hjá ESB.
• Ný kynslóð áætlana 2021-2027. Hver er árangurinn og hvað er framundan?Stjórnendur samstarfsáætlana ESB hjá Rannís mæta í sófaspjall ásamt styrkþegum og kynna það helsta sem er framundan í nýjum áætlunum.
• Rúna Vigdís Guðmarsdóttir forstöðukona Landskrifstofu Erasmus+ og ESC og Álfhildur Leifsdóttir kennari í Árskóla á Sauðárkróki.
• Sigrún Ólafsdóttir stjórnandi Horizon Europe og Rúnar Unnþórsson prófessor og deildarforseti iðnverkfræði- vélaverkfræði- og tölvunarfræðideildar Háskóla Íslands.
• Ragnhildur Zoëga stjórnandi Creative Europe Desk og Gísli Örn Garðarsson leikari, leikstjóri og framleiðandi hjá Evrópa kvikmyndir.
• Myndbönd til kynningar á áhugaverðum verkefnum.
• Lokaorð flytur Lucie Samcová-Hall Allen sendiherra ESB á Íslandi.

Streymið hefst klukkan 14.