Svandís segir litakóðunarkerfi engu breyta á landamærunum

Bjarni Benediktsson fjármálaráðherra og Áslaug Arna Sigurbjörnsdóttir dómsmálaráðherra sögðu að loknum ríkisstjórnarfundi rétt fyrir hádegi að sátt ríkti í ríkisstjórn um reglugerð heilbrigðisráðherra sem tók gildi á miðnætti síðast liðnu. 

Tími til að létta

Áslaug Arna segir baráttuna við veiruna ganga vel og nú þurfi að fara horfa til þess sem sé framundan þegar fleiri séu komnir með vernd vegna bólusetningar.

„Ég held að það sé að koma tími til þess að fara að létta á hér innanlands. Svo ég vona að það verði gert sem fyrst. Það er auðvitað lítið um smit og enginn alvarlega veikur. Ég bind vonir við að hér verði frjálsara og opnara samfélag með hverjum deginum sem líður í átt að sumri og fleiri bólusetningum,“ segir Áslaug Arna.

Gæta eigi meðalhófs

Fjármálaráðherra telur að ný reglugerð Svandísar Svavarsdóttur muni skila árangri enda miði allar aðgerðir stjórnvalda að því. 

Margir sjálfstæðismenn innan og utan þings hafa gagnrýnt sóttvarnaaðgerðirnar og vilja slaka á þeim. 

Bjarni segir að alltaf eigi að gæta meðalhófs og ekki setja meiri takmarkanir á efnahagslífið en staðan kalli á.

„Ég hef fundið fyrir því að margir hafa gagnrýnt þegar bent er á þetta. Til dæmis af þeim þingmönnum sem þú ert að vísa til. Ég hef staðið með þeim í að verja rétt þeirra. Þann sjálfsagða rétt í mínum huga að koma meiri dýpt í umræðuna um áhrif aðgerða,“ segir Bjarni.  

Hann eins og aðrir vonist til að hægt verði að létta á núgildandi aðgerðum bráðlega.

Stefnt á litakóðunarkerfi um næstu mánaðarmót

Heilbrigðisráðherra segist hafa rætt við forystufólk hjá Rauða krossinum og fleirum sem lýst hafi áhyggjum af því hversu hratt breytingum með nýrri reglugerð væri hrint í framkvæmd.

„Ég talaði við framkvæmdastjóra Rauða krossins í morgun. Þetta gerðist náttúrlega allt mjög hratt. Þannig að það eru ýmsir framkvæmdaaðilar bæði á landamærum, í sóttvarnahúsi og svo framvegis sem þurfa að aðlaga sig mjög hratt. Hún fullvissaði mig um það að hér eftir sem hingað til væri Rauði krossinn á fullu að koma til móts við breyttar reglur. Ég vænti þess að þetta verði komið í gott horf seinna í dag,“ sagði Svandís.

Dómsmálaráðherra sagðist ekki vita annað en áfram væri stefnt að því að taka upp litakóðunarkerfi Evrópusambandsins á landamærunum hinn fyrsta maí eins og lýst var yfir í janúar að yrði gert.

„Staðan er auðvitað þannig að við erum að nálgast að geta bólusett alla sem eru eldri en sjötíu ára og enn fleiri seinnipartinn í apríl. Staðan í öðrum löndum er þannig að það mun lítið breytast ef þetta tekur gildi 1. maí,“ segir Áslaug Arna.

Heilbrigðisráðherra tekur undir að lítið muni breytast vegna stöðunnar í öðrum löndum.

„Í raun er þetta allt til skoðunar. Af því að hér eftir sem hingað til gerir sóttvarnalæknir alltaf tillögur til mín um ráðstafanir bæði innanlands og á landamærum. Litakóðunarkerfið sýnir okkur hver staða faraldursins er í Evrópu og við sjáum að hún er mjög alvarleg. Ef við mundum innleiða litakóðunarkerfið í dag mundi það engu breyta um stöðuna vegna þess hve útbreitt smit er í Evrópu. Þetta verðum við bara að skoða þegar nær dregur 1. maí,“ segir Svandís Svavarsdóttir.