„Við verðum bara að bregðast við“

Sautján greindust með kórónuveirusmit innanlands í gær og hafa ekki greinst fleiri smit innanlands síðan 30. nóvember.

Svandís var spurð að því við komuna í Ráðherrabústaðinn hvort það væru þung skref að taka á svona degi.

„Við verðum bara að bregðast við. Þetta er bara svona,“ segir Svandís. Staðan sem upp sé komin væru vonbrigði.

„Já, það hlýtur að vera það en við verðum að bregðast við og ætlum að gera það.“

Þá staðfesti hún að hertar aðgerðir yrðu kynntar síðdegis.

Katrín Jakobsdóttir forsætisráðherra var gripin tali á leiðinni á fundinn.

„Við erum orðin öllu von og vitum alveg hvað virkar í baráttunni við þessa veiru,“ segir Katrín.

„Við erum að sjá þetta breska afbrigði sem er bráðsmitandi svo það er mikilvægt að bregðast hratt við.“

Fram undan væru umræður á fundi ráðherra um tillögur Þórólfs Guðnasonar sóttvarnalæknis.

Fólk þurfi að standa saman

Bjarni Benediktsson fjármálaráðherra talaði á svipuðum nótum.

„Það eru alltaf vonbrigði þegar við sjáum smit utan sóttkvíar í vexti. Við verðum að taka alvarlega ábendingum um að það geti verið að leynast smit í samfélaginu sem gætu farið í veldisvöxt. Við stöndum frammi fyrir því að taka áhættuna á því að allt fari vel eða að bregðast við,“ segir Bjarni.

Aðspurður hvort hann teldi að þetta myndi seinka efnahagsbatanum sagði Bjarni:

„Ekki ef okkur tekst að slá þetta niður hratt og örugglega. Það gerist ekki inni í þessu húsi,“ sagði Bjarni og átti við Ráðherrabústaðinn.

„Það gerist úti í samfélaginu, að fólk standi saman um að gæta varúðar.“

Nú þurfi fólk að standa saman.

„Alveg tvímælalaust.“

Boðað hefur verið til blaðamannafundar klukkan 15 þar sem aðgerðirnar verða kynntar. Vísir verður að sjálfsögðu með beina útsendingu frá fundinum.