Tvö hundruð áhorfendur leyfðir á íþróttaviðburðum

Eftir ríkisstjórnarfund í Ráðherrabústaðnum greindi Svandís Svavarsdóttir heilbrigðisráðherra frá því að tvö hundruð manns megi mæta á íþróttaviðburði.

Það er að því gefnu að hægt sé að tryggja að fólk sé í sætum og eins metra fjarlægð sé á milli óskildra aðila. Þá þarf fólk að vera með grímu.

Tilslakanirnar taka gildi á morgun og gilda að öllu óbreyttu í þrjár vikur.

Algjört áhorfendabann hefur verið á íþróttaviðburðum hér á landi síðan 20. október 2020. Keppni í íþróttum, án áhorfenda var leyfð að nýju 13. janúar.