Greyskies frumsýnir nýtt myndband

Greyskies er nýtt listamannanafn Steinars Baldurssonar sem gerði góða hluti sem poppari hér á landi fyrir nokkrum árum og var mjög vinsæll. Hann hefur nú breytt um tónlistarstefnu og mættir sem nýr maður til leiks.

Myndbandið var tekið upp í miðju samkomubanni á sviðinu í Bæjarbíó í Hafnafirði og var skotið af Tómasi Welding. Lagið Hurts So Bad er önnur smáskífan af fyrstu plötu Greyskies sem væntanleg er síðar á þessu ári. Það er Alda Music sem gefur út plötuna og hefur tónlistin sem heyrst hefur hingað til fengið góðar undirtektir. Fyrsta smáskífan ber heitið Numb og hefur fengið að hljóma látlaust á X977 síðustu mánuði.

Flestir tónlistarmenn sem eru að gefa út tónlist um þessar mundir hafa þurft að sætta sig við samkomutakmarkanir og þar af leiðandi ekki getað haldið tónleika.

„Það er svekkjandi að geta ekki haldið tónleika og fengið viðbrögð áhorfenda frá fyrstu hendi en það var þó gott að komast uppá svið og spila þessi lög þó það væri bara fyrir myndavélarnar. Það er líka einhver sjarmi yfir því að spila í tómum sal en samt með allt í botni,” segir Steinar.

Lagið Hurts So Bad er nú þegar komið í spilun á útvarpsstöðvum landsins og er aðgengilegt á öllum helstu streymisveitum.