Serena brast í grát á blaðamannafundi eftir tap fyrir Osaka

Osaka mætir Jennifer Brady í úrslitaleik Opna ástralska á laugardaginn. Osaka getur þar unnið sinn fjórða risatitil á ferlinum.

Eftir leikinn þakkaði Serena áhorfendum í Rod Laver Arena fyrir sig og í kjölfarið veltu margir fyrir sér framtíð hennar.

„Ég veit ekki. Ef ég kveð einhvern tímann myndi ég ekki segja neinum það,“ sagði Serena á blaðamannafundi eftir leikinn gegn Osaka.

Þegar Serena var spurð út í mistökin sem hún gerði í leiknum brast hún í grát. „Ég veit ekki. Ég er búin,“ sagði Serena áður en hún gekk af blaðamannafundinum.

Hin 39 ára Serena hefur unnið 23 risatitla á glæsilegum ferli og vantar aðeins einn titil til að jafna met Margaretar Court.

Síðan Serena sneri aftur eftir að hafa eignast dóttur sína 2018 hefur hún tapað öllum fjórum leikjum sínum í undanúrslitum eða úrslitum risamóta.