Íslenska liðið heldur utan til Kósóvó á laugardaginn. Síðustu leikirnir í riðlinum fara fram í eins konar „búbblu“ þar í landi. Ísland mætir Slóvakíu fimmtudaginn 18. febrúar og Lúxemborg tveimur dögum síðar.
Ísland er í efsta sæti riðilsins og þarf einn sigur til viðbótar til að tryggja sér sæti í aðal undankeppni HM.
Craig Pedersen valdi þrettán leikmenn sem taka þátt í leikjunum tveimur. Styrmir Snær er eini nýliðinn í íslenska hópnum en hann hefur slegið í gegn með Þór í Domino's deildinni í vetur.
Martin Hermannsson er áfram fjarri góðu gamni vegna anna með spænska liðinu Valencia. Þá gáfu Haukur Helgi Pálsson, Ægir Þór Steinarsson, Pavel Ermolinskij, Breki Gylfason og Collin Pryor ekki kost á sér af ýmsum ástæðum.
Sjö af þrettán leikmönnum í íslenska hópnum leika hér á landi. Fjórir leika á Spáni, einn í Þýskalandi og einn í Litáen.
Íslenski hópurinn
- Elvar Már Friðriksson · BC Siauliai, Litháen (48)
- Gunnar Ólafsson · Stjarnan (22)
- Hjálmar Stefánsson · CB Carbajosa, Spánn (18)
- Hörður Axel Vilhjálmsson · Keflavík (86)
- Jón Axel Guðmundsson · Fraport Skyliners, Þýskalandi (13)
- Kári Jónsson · Girona Basket, Spánn (14)
- Kristinn Pálsson · Grindavík (15)
- Ólafur Ólafsson · Grindavík (38)
- Ragnar Ágúst Nathanaelsson · Haukar (49)
- Sigtryggur Arnar Björnsson · Real Canoe, Spánn (12)
- Styrmir Snær Þrastarson · Þór Þorlákshöfn (Nýliði)
- Tómas Hilmarsson · Stjarnan (8)
- Tryggvi Snær Hlinason · Basket Zaragoza, Spánn (41)