Fullt í alla tíma og ætla að nýta sólarhringinn enn betur

Hrönn Svansdóttir, framkvæmdastjóri Crossfit Reykjavík, segir tilfinninguna góða og mikinn létti fyrir starfsmenn og iðkendur að hægt sé að mæta í tíma.

„Strax klukkan sex í morgun var létt yfir öllum sem mættu,“ segir Hrönn. Fullt sé í alla tíma og biðlistar.

„Við bætum við tímum jafnt og þétt yfir daginn.“

Þannig minnir Hrönn á að enn sé svigrúm í sólarhringnum til að bæta við tímum á meðan eftirspurn sé hjá iðkendum.

Tuttugu manna hólf og þjálfari á staðnum

Skilyrði fyrir opnun líkamsræktarstöðva eru töluverð. Þær mega aðeins hafa 50 prósent af leyfilegum hámarksfjölda gesta en um leið aðeins opið fyrir hóptíma þar sem þjálfari hefur yfirsýn og stjórn og tryggir að neðangreindum reglum sé fylgt. Tuttugu manna hámark í hvern tíma.

Allir iðkendur þurfa að vera fyrirframskráðir í tíma og því til fullkomin skrá yfir það hver var hvar og hvenær og smitrakning því auðveld. Búningsklefar verða að vera lokaðir og iðkendur mæta tilbúnir til æfinga í stöðina.

Æfingasvæði þarf að skipta niður í hólf og ekki séu fleiri í hólfi en sem nemur fjórum fermetrum á hvern iðkanda, en að hámarki tuttugu í hverju hólfi. Hver iðkandi heldur sig innan síns svæðis út alla æfinguna og tveggja metra nándarregla viðhöfð.

Engum búnaði er deilt á milli einstaklinga innan hvers tíma. Hver tími má að hámarki vera 60 mínútur og viðvera hvers iðkanda í húsi sé því aldrei lengri en 60 mínútur. Við komu í hús sé tryggt að allir sótthreinsi hendur og beri grímur þar til æfing hefst.

Eftir æfingu sótthreinsi allir hendur áður en búnaður er sótthreinsaður. Eftir æfingu (þegar hendur hafa verið sótthreinsaðar) sótthreinsi allir þann búnað sem þeir notuðu. Rekstraraðili ber ábyrgð á sótthreinsun búnaðar. Við útgöngu sótthreinsi fólk hendur.

Engir tveir tímar liggja saman svo tveir hópar eru ekki að mætast í rýmum hússins, eins og anddyri. Milli hópa séu salerni, vaskar og aðrir snertifletir sótthreinsaðir af starfsmanni. Í sameiginlegum rýmum skal tryggja tveggja metra nálægðarreglu og þegar því verður ekki við komið skal andlitsgríma notuð.

Framlengja kortin um lokaða tímabilið

World Class opnaði stöðvar sínar í dag og þar á meðal splunkunýja stöð fyrirtækisins í Vatnsmýri. Á Facebook-síðu World Class er fyrirkomulagið í stöðvunum útskýrt ítarlega.

World Class er með hópatíma bæði í minni sölum sínum og svo líka í æfingasölunum með hlaupabrettum og lóðum. Í þá tíma þarf þó að skrá sig eins og alla aðra og þjálfari á staðnum.

Þá kemur fram að ekki verði rukkað af samningum iðkenda fyrir tímabil sem World Class hefur verið lokað. Öllum tímabundnum kortum hefur verið framlengt um lokaða tímabilið.

Sporthúsið býður sömuleiðis viðskiptavini sína velkomna á nýjan leik og taka sóttvarnarreglur föstum tökum. Fram kemur á heimasíðu Sporthússins að þeir sem hlýði ekki starfsfólki verði vísað úr líkamsræktarstöðinni. Barnagæsla er lokuð í Sporthúsinu sem og World Class.

Þá birtir Hreyfing góð ráð á heimasíðu sinni til iðkenda.

Þvoum hendur vel með sápu fyrir og eftir æfingu.

Munum að skráning er í alla hóptíma.

Gætum þess vel að hafa gott bil á milli manna.

Mætum með okkar eigin jógahandklæði á dýnuna.

Mætum með okkar eigin vatnsbrúsa.

Gætum að hreinlæti við notkun vatnshana.

Notum sótthreinsispritt.

Þrífum áhöld, tæki og tól vel fyrir og eftir notkun.

Forðumst að snerta augu, nef og munn með óhreinum höndum.

Ekki heilsast með faðmlagi eða handabandi.

Hóstum og hnerrum í pappír eða í olnbogabót og þvoum hendur vel á eftir.

Notum hanska.

Hreyfum okkur a.m.k. 30 mín. á dag og borðum næringaríka fæðu.

Ekki mæta í ræktina ef við finnum fyrir einhverjum mögulegum flensueinkennum.

Ekki mæta í ræktina ef við eigum að vera í sóttkví.