Þriggja bíla árekstur á Nýbýlavegi

Tveir voru fluttir með sjúkrabíl á slysadeild eftir þriggja bíla árekstur á Nýbýlavegi sem varð eftir klukkan átta í morgun.

Samkvæmt upplýsingum frá slökkviliðinu er þó ekki talið að fólkið sé með mikla áverka heldur blésu loftpúðar út og þá er vissara að athugað sé með líðan á spítala.

Þeir sem fluttir voru á slysadeild voru ökumaður og farþegi í einum bílnum en í hinum tveimur bílunum voru ökumennirnir einir á ferð.

Vinnu slökkviliðs er lokið á vettvangi en lögregla hefur umsjón með að fjarlægja bílana sem lentu í árekstrinum.

Fréttin var uppfærð kl. 08:53.