Tveggja ára snáði sprækur í ein­angrun með hunds­lappri mömmu og ömmu í Stykkis­hólmi

Þorgerður Sigurðardóttir sjúkraþjálfari er ein þeirra hundruð Íslendinga sem eru smitaðir af kórónuveirunni sem veldur sjúkdómnum COVID-19. Hún veiktist á laugardaginn og þrátt fyrir að hafa ekki farið í sýnatöku segir hún engan vafa leika á því að hún sé með veiruna.

Hún smitaðist af dóttur sinni, Kristínu Eygló Kristjánsdóttur, sem varð mjög veik af veirunni síðastliðinn fimmtudag. Þá voru þær mæðgur þegar komnar í sóttkví í Stykkishólmi en Kristín var alveg einkennalaus þar til hún veiktist.

Þar eru þær nú í einangrun ásamt Teodoro Kristjáni, tæplega tveggja ára gömlum syni Kristínar og manns hennar, Francisco. Þorgerður segir drenginn mjög hressan, hann hafi aðeins mælst með nokkrar kommur, en þær mæðgur hafi báðar orðið mjög veikar.

Þorgerður deildi sinni sögu í færslu á Facebook-síðu sinni í gær, aðallega til að brýna fyrir fólki að sóttkví skipti máli en einnig til að benda á að veiran smitast eins og ekkert sé.

Kristín, Teodoro litli og Francisco, sem er Spánverji, búa á Spáni og hafa gert í mörg ár. Síðastliðinn miðvikudag komu þau Kristín og Teodoro til Íslands og sótti Þorgerður þau til Keflavíkur. Þaðan óku þau beinustu leið til Stykkishólms í sóttkví þar sem móðir Þorgerðar á hús.

Vildi Þorgerður fara með mæðginunum vestur í sóttkví til að geta aðstoðað dóttur sína með drenginn ef hún skyldi veikjast.

Á miðvikudagskvöldið fengu þau fregnir af því að Francisco væri orðinn veikur en  hann var ekki með nein einkenni um veiruna þegar mæðginin fóru til Íslands og enginn grunur um að hann væri smitaður. Kristín var enn spræk, vissulega þreytt eftir ferðalagið og keyrsluna en ekki lasin.

Hún vaknaði síðan veik á fimmtudagsmorgninum og veikindin versnuðu mjög hratt. Kristín fór í sýnatöku fyrir kórónuveirunni og reyndist sýnið jákvætt. Henni líður aðeins betur núna að sögn Þorgerðar þótt það sé aðeins sveiflukennt.

Var komin með 39,7 stiga hita í gærkvöldi

„Hún var orðin veik strax morguninn eftir að hún kom. Hún hefur verið með lítinn hita upp á síðkastið en það ber aðeins á mæði og ofboðslegri þreytu. Aftur á móti veikist ég á laugardegi þannig að þetta er mjög stuttur meðgöngutími í okkar tilviki og ég er búin að vera með mjög mikinn hita. Þetta gerist rosalega hratt hjá okkur báðum en ég er búin að vera með mjög mikinn hita svolítið lengi. Ég er búin að vera með aldrei undir 39 núna síðan á sunnudag og ég var komin í 39,7 í gærkvöldi,“ segir Þorgerður í samtali við Vísi.

Hún segir paratabs hjálpa til við að slá á hitann en lýsir annars einkennunum á þann veg að það sé mikill slappleiki, höfuðverkir, beinverkir og kuldi samfara þessum mikla hita.

Þorgerður segir dóttur sína kannski áhyggjufyllri en þær séu báðar hraustar.

„Og ég hef þannig séð ekki haft áhyggjur, þetta er náttúrulega bara hundleiðinlegt, en ég hef ekki verið með nein öndunarfæraeinkenni, enn sem komið er og það heldur mér svolítið glaðri.“

Þá sé Kristín heldur ekki með nein alvarleg öndunarfæraeinkenni þótt hún hafi upplifað mæði.

„Ég þarf að nota astmalyf í kulda og þegar ég fer út að hlaupa, ég labba á fjöll og hleyp, og ef ég er úti í kulda þá þarf ég að nota astmalyf. Ég má nota þau og ég er kannski að nota þau tvisvar á dag. Ég er enn sem komið er, sjö, níu, þrettán, laus við öndunarfæravanlíðan. En það hefur aðeins örlað á því hjá tengdasyni mínum á Spáni og dóttur minni,“ segir Þorgerður.

Vildi koma konu og barni til Íslands vegna mikillar útbreiðslu veirunnar á Spáni

Hún segir tengdason sinn hafa viljað koma konu sinni og barni til Íslands vegna mikillar útbreiðslu veirunnar á Spáni. Hann hafi óttast að staðan á Spáni yrði eins og á Ítalíu. Hann sjálfur megi hins vegar ekki yfirgefa landið þar sem hann er lögreglumaður og þar með partur af almannavarnakerfi landsins.

Þorgerður lýsir í færslu sinni á Facebook þeim mun sem þau fjölskyldan hafi upplifað annars vegar á heilbrigðiskerfinu hér og hins vegar á kerfinu úti á Spáni.

Þannig hafi Francisco ekki náð sambandi við neinn heilbrigðisstarfsmann fyrr en fyrst í gær eftir að hafa reynt að ná sambandi í marga daga. Hann hefur ekki farið í sýnatöku vegna veirunnar og Þorgerður kveðst halda að það standi ekki til að hann fái að fara í sýnatöku. Hann er enn í einangrun en er að hressast, er til að mynda orðinn hitalaus.

Kerfið virðist þannig ekki ráða við álagið á Spáni og segir Þorgerður mun betra að vera á Íslandi. Þær mæðgur séu mjög þakklátar og þá sérstaklega fyrir íslenskt heilbrigðisstarfsfólk.

Þannig hafi þær fengið símtöl frá læknum á hverjum degi eftir að Kristín greindist, bæði frá læknum í Stykkishólmi og COVID-teyminu á Landspítala.

Vill ekki eyða dýrmætum veirupinna í greiningu

„Það hefur verið staðið ofboðslega vel að þessu öllu saman og ég var alveg sammála því að það er engin þörf á að testa mig. Ég er búin að vera í mjög góðu sambandi bæði við COVID-teymið á Landspítalanum og læknana hér og það er hringt og passað upp á okkur og spurt um einkenni. Þannig að það eru allir sammála um það að ég teljist vera með þessa veiki, það þarf ekki að eyða pinna á þetta, þeir eru of dýrmætir, það er enginn vafi,“ segir Þorgerður.

Eins og áður segir er Teodoro litli mjög hress.

„Hann er bara sprækur, sjö, níu, þrettán og gott í raun og veru að hún varð veik fyrst og þá gat ég passað upp á hann. Svo hef ég verið einskis nýt núna síðustu dagana. En þá hefur hún verið hressari,“ segir Þorgerður.

Hún segir mikla gleði að dóttir hennar og barnabarn hafi komist til Íslands en á sama tíma sé erfitt að vita af tengdasyninum einum úti á Spáni.

„Og ofboðslega erfitt fyrir dóttur mína að hafa farið frá honum. Það er náttúrulega ekkert létt en hann lagði hart að þeim að fara til Íslands. Vonandi gengur þetta yfir þannig að þau geta sameinast aftur.“