Sóttvarnalæknir telur ekki þörf á að loka Austurland af

Það er mat sóttvarnalæknis að það þjóni ekki tilgangi sínum að loka Austurland af í sóttvarnaskyni, en enn sem komið er hefur ekkert smit greinst á svæðinu. Þetta er niðurstaða samráðsfundar Almannavarnanefndar Austurlands, Þórólfs Guðnasonar sóttvarnalæknis og Víðis Reynissonar yfirlögregluþjóns.

Þetta kemur fram í tilkynningu frá lögreglunni á Austurlandi í kvöld. Þar segir jafnframt að umræða hafi átt sér stað meðal íbúa hvort loka ætti Austurland af til þess að koma í veg fyrir smit.

„Á fundinum var farið vandlega yfir kosti og galla slíkrar lokunar. Að vel athuguðu máli er það mat sóttvarnarlæknis að lokun þjóni ekki tilgangi sínum fremur en að loka landinu öllu. Það muni fremur fresta vandanum en leysa hann enda óvíst þá hversu lengi landshlutinn yrði að vera lokaður.“

Þá er tekið fram að líklegt sé að smit muni koma upp á Austurlandi á einhverjum tímapunkti. Íbúar eru þó hvattir til þess að fylgja leiðbeiningum sóttvarnarlæknis í hvívetna og fara eftir ráðum heilbrigðisyfirvalda.