Meistararnir tryggðu sér aukafrí og Jaguars fólk fagnaði þrátt fyrir tap

Meistarar Kansas City Chiefs verða í efsta sæti Ameríkudeildarinnar í úrslitakeppninni eftir 17-14 eftir frekar ósannfærandi sigur á Atlanta Falcons. Chiefs hefur unnið 14 af 15 leikjum sínum og situr hjá í fyrstu umferð úrslitakeppninnar.

Patrick Mahomes tryggði sínu liði sigurinn þegar hann fann útherjann Demarcus Robinson í endamarkinu tveimur mínútum fyrir leikslok. Þetta er í fyrsta sinn í sögu Kansas City Chiefs sem liðið vinnur fjórtán leiki á einu tímabili.

Pittsburgh Steelers endaði þriggja leikja taphrinu sína með 28-24 endurkomusigri á Indianapolis Colts. Með þessum sigri tryggði Pittsburgh sér sigur í norðurriðli Ameríkudeildarinnar og vann einnig mjög langþráðan sigur. Colts liðið gat tryggt sig inn í úrslitakeppnina með sigri og komst í 24-7 í leiknum en missti sigurinn frá sér í lokin.

Seattle Seahawks tryggði sér sigur í vesturriðli Þjóðardeildarinnar með 20-9 sigri á Los Angeles Rams en þetta er í fyrsta sinn síðan 2016 sem Seattle liðið vinnur sinn riðil.

Green Bay Packers er á miklu skriði og vann sinn fimmta leik í röð í nótt. Packers vann þá 40-14 stórsigur á Tennessee Titans í snjónum í Green Bay þar sem útherjinn Davante Adams skoraði þrjú snertimörk. Green Bay Packers er búið að vinna norðurriðil Þjóðardeildarinnar og tryggir sér frí í fyrstu umferð úrslitakeppninnar með sigri á Chicago í lokaumferðinni.

Það er ekki oft sem stuðningsmenn liða fagna eftir enn einn tapleikinn en það gerðu örugglega stuðningsmenn Jacksonville Jaguars eftir að liið steinlá 41-17 á móti Chicago Bears. Tapið sen og annar sigur New York Jets liðsins í röð þýðir að Jacksonville Jaguars verður með fyrsta valrétt í næsta nýliðavali. Þar mun liðið væntanlega velja hinn eftirsóttar leikstjórnanda Trevor Lawrence.

Cleveland Browns gat tryggt sig inn í úrslitakeppnina með sigri á New York Jets en tapaði 16-23 á heimavelli. Browns missti alla helstu útherja sína á COVID-listann rétt fyrir leikinn.