Steinunn og Guð­mundur Ágúst í­þrótta­fólk ársins í Reykja­vík

Það íþróttafólk sem tilnefnd var sem Íþróttafólk Reykjavíkur 2020 fær fjárstyrk frá ÍBR, Íþróttabandalagi Reykjavíkur. Þá fá íþróttalið sem náðu framúrskarandi árangri á árinu styrk frá ÍBR. Það eru þau lið sem urðu Íslands-, bikar- og deildarmeistarar.

Lista yfir íþróttafólk og íþróttalið má finna hér að neðan.

Frá þessu var greint inn á vef Íþróttabandalags Reykjavíkur.

Steinunn Björnsdóttir, íþróttakona Reykjavíkur 2020

„Steinunn Björnsdóttir er fyrirliði bikar- og deildarmeistara Fram í handknattleik 2020. Steinunn hefur verið besti leikmaður Íslandsmótsins í handbolta, eftir síðasta tímabil var hún valin besti varnar- og línumaður sem og valin mikilvægasti leikmaðurinn. Steinunn er fyrirmyndar leikmaður og mikill leiðtogi inn á vellinum. Hún leggur áherslu á að miðla reynslu sinni til yngri iðkenda og heldur fyrirlestra í félögum á höfuðborgarsvæðinu. Við óskum Steinunni Björnsdóttur til hamingju með titilinn Íþróttakona Reykjavíkur 2020,“ segir í tilkynningu Reykjavíkurborgar.

Guðmundur Ágúst, íþróttamaður Reykjavíkur 2020

„Á árinu 2020 var Guðmundur Ágúst með keppnis­rétt á næst sterkustu atvinnumótaröð Evrópu, Challenge Tour (Áskorendamótaröðinni) en aðeins fimm íslenskir kylfingar hafa öðlast keppnisrétt á Áskorendamótaröðinni. Guðmundur Ágúst endaði í 46. sæti á stigalistanum sem er næst besti árangur hjá íslenskum atvinnukylfingi á mótaröðinni. Besti árangur hans var á Norður-Írlandi þar sem Guðmundur Ágúst endaði í 5. sæti. Guðmundur Ágúst hefur farið hratt upp heimslistann á undanförnum misserum. Við óskum Guðmundi Ágústi Kristjánssyni til hamingju með titilinn Íþróttamaður Reykjavík­ur 2020,“ segir í tilkynningu Reykjavíkur borgar.

Eftirfarandi íþróttafólk var tilnefnt sem Íþróttafólk Reykjavíkur 2020 og fær því fjárstyrk frá ÍBR:

Ásdís Hjálmsdóttir Annerud, spjótkastari - Ármann

Bergrún Ósk Aðalsteinsdótt­ir, frjálsíþrótta­kona - ÍR

Elín Metta Jensen, knattspyrnukona - Valur

Kristrún Guðnadóttir, gönguskíðakona - Ullur

Birkir Már Sævarsson, knattspyrna - Valur

Guðni Valur Guðnason, kringlukast - ÍR

Júlían Jóhann Karl Jóhannsson, kraftlyftingar - Ármann

Snorri Einarsson, skíðaganga – Ullur

Eftirfarandi íþróttalið voru tilnefnd sem íþróttalið ársins og fá fjárstyrk frá ÍBR:

Handknattleiksdeild Fram

Keiludeild ÍR

Keilufélag Reykjavíkur

Tennis- og badmintonfélag Reykjavíkur

Handknattleiksdeild Vals

Knattspyrnu­deild Vals

Körfuknattleiksdeild Vals

Borðtennisdeild Víkings

Karatefélag Þórshamars