Missir öku­réttindi í níu mánuði og sektaður um tæpar fjór­tán milljónir

Fyrra atvikið snýr að atviki undir lok marsmánaðar er Grealish keyrði á kyrrstæða bíla á hvítri Range Rover bifreið sinni. Samkvæmt vitnum var áfengislykt af Grealish, átti hann erfitt með tal og virtist almennt óstöðugur á fótunum.

Lögmaður Grealish taldi skóklæðnað leikmannsins hafa verið ástæðuna fyrir öllu saman en hann var í inniskóm er atvikið átti sér stað árla sunnudagsmorgun þann 29. mars síðastliðinn. Grealish hefur borgað það tjón sem hann olli þann dag.

Þann 18. október var Grealish svo tekinn fyrir of hraðan akstur og ógnandi tilburði á veginum. Er lögregla náði loks í skottið á honum sagði hinn 25 ára gamli leikmaður að hann væri að verða of seinn á æfingu.

Annar af lögreglumönnunum sem stöðvaði Grealish þann daginn segir hann hafa verið kurteisan og rólegan á meðan lögreglan ræddi við hann.

Dómari málsins engin sönnunargögn liggja fyrir um hvort Grealish hafi verið ölvaður í fyrra skiptið og þá gat hann ekki staðfest að hann hafi keyrt yfir löglegum hámarkshraða í seinna skiptið. Hann ákvað þó á endanum að Grealish myndi missa ökuréttindi sín í níu mánuði og þyrfti að borga sekt upp á 14 milljónir íslenskra króna eða 82.500 pund.

Grealish hefur átt frábært tímabil með Aston Villa og virðist vera kominn í mjúkinn hjá Gareth Southgate, landsliðsþjálfara Englands. Það er spurning hvort þessi dómur ásamt eilífu skemmtanahaldi Grealish leiði til þess að hann missi sæti sitt þar.

The Independent greindi frá.