Bein útsending: Kvöldfréttir Stöðvar 2

Miklar áhyggjur eru af hópamyndun um næstu helgi þegar próftörn lýkur í mörgum skólum. Ef sóttvarnareglur eru ekki virtar geti fólk átt von á sektum að sögn yfirlögregluþjóns. Fjallað verður um málið í kvöldfréttum Stöðvar 2. 

Einnig verður greint frá frumniðurstöðum rannsóknarinnar Líðan þjóðar á tímum COVID-19, meðal annars því að þeir sem fá Covid eru líklegri en aðrir til að fá þunglyndi og áfallastreitu.

Í fréttatímanum verðum við einnig í beinni útsendingu frá Vesturbæjarlaug og ræðum við forstöðukonu laugarinnar um hvort sundgestir virði sóttvarnareglur.

Þá verður fjallað um ofbeit á hálendinu en sauðfjárbændur sem hafa verið sakaðir um slíkt segja þvert á móti að beitarsvæði séu að gróa upp.

Einnig hittum við góðhjörtuðu ofurhetjurnar Atlas og Avion sem mættu hlaðnir bókum á barnaspítala Hringsins í dag.

Þetta og margt fleira í kvöldfréttum á samtengdum rásum Stöðvar 2, Bylgjunnar og á Vísi kl. 18:30