Pálínuboðin varasöm vegna hættu á snertismiti

Aðventan er gengin í garð og undirbúningur hátíðanna nær fljótlega hámarki. Rík hefð er fyrir því að fólk komi saman og njóti samverunnar og alls þess sem hátíðarnar hafa upp á að bjóða. Sérstakar leiðbeiningar um skemmtanahald og mannamót yfir hátíðarnar voru birtar á Covid.is í dag. 

Skipuleggi öðruvísi jól

Rögnvaldur Ólafsson aðstoðaryfirlögregluþjónn hjá almannavarnadeild ríkislögreglustjóra sagði í útvarpsþættinum Reykjavík síðdegis á Bylgjunni í dag að leiðbeiningarnar væru ákveðin útfærsla á núgildandi sóttvarnareglum, sett í samhengi við aðventuna og jólin.

Hann benti á að enn giltu reglur um fjöldatakmarkanir og annað en eins og staðan er í dag er miðað við tíu manna samkomubann. Ólíklegt þykir að slakað verði á því í bráð.

Landsmenn eru þannig hvattir til að velja sér jólavini yfir aðventuna, safna í svokallaða „jólakúlu“, og Rögnvaldur mælti með að fólk byrji að huga að því tímanlega með hverjum það hygðist verja jólunum.

„Og ég tala nú ekki um ef einhver viðkvæmur er í þeim hópi að gera jafnvel ráðstafanir um að halda sig frá öðrum fram að því, hálfgerða sóttkví, þannig að fólk passi sig extra vel dagana áður en það fer að hittast og minnka þannig líkurnar á að smit komist áfram,“ sagði Rögnvaldur.

Inntur eftir því hvort mælt væri gegn því að fólk sem ætti til dæmis uppkomin börn, sem komin væru með eigin fjölskyldur, byði niðjunum heim sagði Rögnvaldur að svo væri ekki.

„Nei, við erum ekkert að tala endilega á móti því heldur að fólk hugsi þetta, skipuleggi þetta og sé ekki að fara í marga svona hópa eins og er gjarnan hjá okkur um jólin. Að reyna að skipuleggja jólin með því hugarfari að þau verði öðruvísi en önnur ár.“

Pálínuboðin varasöm

Sérstaklega er mælt gegn því í jólaleiðbeiningunum að haldin séu svokölluð Pálínuboð, öðru nafni samskotsboð, hlaðborð og annað slíkt. Rögnvaldur sagði að þessum tilmælum væri ætlað að draga úr líkum á snertismitum. 

Víðir Reynisson yfirlögregluþjónn, sem greindist með Covid ásamt nokkrum öðrum eftir gestagang á heimili hans, telur til að mynda líklegt að smit hafi dreifst með sameiginlegum snertifleti á heimilinu; kaffikönnu eða slíku.

„Já, þetta er það sem við höfum séð í einhverjum af þeim smitum sem hafa komið upp, er einmitt þetta. Það er að fólk hittist og heldur fjarlægð og annað en síðan eru sameiginlegir snertifletir. Eins og þetta, sameiginleg verkfæri við matarborðið og þess háttar,“ sagði Rögnvaldur.

Hefur heyrt að margir hafi frestað boðum

Átta greindust með veiruna í gær en af þeim voru þó aðeins þrír í sóttkví. Rögnvaldur sagði að skýrari mynd myndi fást af þróun smita á næstu dögum; smit hverrar helgar greinist til að mynda oftast ekki fyrr en um miðja vikuna á eftir. En hver er tilfinning Rögnvaldar eftir nýliðna helgi?

„Ég hafði töluverðar áhyggjur eftir síðustu helgi því þá vorum við að sjá svolítið mörg smit. En ég hef líka heyrt af því núna að mjög margir hafi frestað boðum sem voru plönuð núna um þessa helgi, nýliðna helgi, og vonandi hefur það haft einhver margfeldisáhrif þarna út og það hafi mjög margir ákveðið að geyma sín boð. Þannig að vonandi sjáum við ekki hól í grafinu,“ sagði Rögnvaldur.

Hann sagði aðspurður að einhver erill hefði verið um helgina, í það minnsta á höfuðborgarsvæðinu, sem væri vísbending um að fólk hafi eitthvað verið að hittast. Það hefði þó vonandi verið í minna lagi. Þá beindi Rögnvaldur því enn og aftur til fólks að skipuleggja vel hópamyndanir sem fyrirhugaðar eru á aðventunni.

„Láti ekki bara kylfu ráða kasti heldur reyna að plana þetta hvernig fólk ætlar að hafa hátíðirnar og sína jólakúlu.“

Viðtalið við Rögnvald má hlusta á heild í spilaranum hér fyrir ofan.