Frederik­sen og tólf ráð­herrar til við­bótar í sótt­kví

Mette Frederiksen, forsætisráðherra Danmerkur, er komin í sóttkví og mun fara í skimun. Þetta gerir forsætisráðherrann eftir að staðfest var að dómsmálaráðherrann Nick Hækkerup, sem hún var í samskiptum við síðasta föstudag, greindist smitaður af kórónuveirunni.

Frederiksen segist ekki vera með nein einkenni Covid-19 og hún muni eftir fremsta megni áfram sinna störfum sínum, með fleiri fjarfundum að heiman.

Sem stendur eru þrettán danskir ráðherrar af tuttugu í sóttkví.

Fjöldi smita hafa komið upp í danska þinginu, þar á meðal Søren Pape Poulsen, leiðtogi Íhaldsflokksins.

Fréttir bárust af því í gær að atkvæðagreiðslum í danska þinginu hafi verið frestað vegna smita. Sömu sögu var að segja af fyrirspurnatíma forsætisráðherrans sem var á dagskrá.

Smitum hefur fjölgað í Danmörku síðustu dagana, en í gær var greint frá því að 1.353 hafi greinst smitaðir á mánudag og fjórir til viðbótar látist af völdum Covid-19.