Lögreglan hvetur fólk til að læsa og vera á varðbergi

Lögreglunni á Norðurlandi eystra bárust í gærkvöldi tilkynningar um aðila sem hafði farið inn í nokkur hús á Siglufirði. Hann er grunaður um að hafa tekið verðmæti úr húsum í bænum en ekkert húsanna sem um ræðir var læst.

Lögreglan hvetur íbúa á Tröllaskaga að læsa húsum sínum og vera á varðbergi.

Tvisvar sinnum í gærkvöldi komu húsráðendur að manninum þar sem hann var kominn inn. Honum tókst þó að komast í burtu í bæði skiptin og hefur hann ekki fundist.

Samkvæmt lögreglunni var hann dökkklæddur, með dökka hettu sem huldi andlit hans að mestu.