37 greindust innan­­lands og þrír nú á gjör­gæslu

37 greindust með kórónuveiruna innanlands í gær. Ellefu þeirra sem greindust voru í sóttkví við greiningu, 26 ekki. Alls eru þrettán nú á sjúkrahúsi vegna Covid-19, þar af þrír á gjörgæslu.

Þetta kemur fram í uppfærðum tölum á vefnum covid.is. Þrjú smit greindust á landamærum þar sem beðið er niðurstöðu mótefnamælingar í öllum tilvikum.

605 manns eru nú í einangrun, samanborið við 582 í gær. Þá eru 1.845 í sóttkví í dag, samanborið við 1.697 í gær.

Af þeim 37 sem greindust innanlands í gær greindust 31 eftir að tekin voru svokölluð einkennasýni og sex við sóttkvíar- og handahófsskimun.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 149,7 en var 145,4 í gær. Þá er nýgengi landamærasmita nú 7,1 líkt og í gær.

Nú hafa 2.809 manns greinst smitaðir af kórónuveiru á Íslandi frá upphafi faraldursins. Tíu þeirra sem hafa veikst af Covid-19 eru látnir.

Alls voru tekin 908 einkennasýni hjá sýkla- og veirufræðideild Landspítalans og Íslenskri erfðagreiningu í gær og 791 sýni á landamærunum eða í seinni landamæraskimun. Þá voru 212 sýni tekin við sóttkvíar- og handahófsskimun og 149 í annarri skimun hjá Íslenskri erfðagreiningu.