Dóttir Lars Lagerbäck fékk kórónuveiruna

Lars Lagerbäck sagði frá áhrifum kórónuveirunnar á sína fjölskyldu í viðtali við heimasíðu Alþjóða knattspyrnusambandsins.

Lars Lagerbäck stýrir norska landsliðinu í Þjóðadeildinni í kvöld þegar Austurríkismenn koma í heimsókn á Ullevaal leikvanginn í Osló.

Lagerbäck gerði frábæra hluti með íslenska landsliðinu á árunum 2011 til 2016 og nú er hann að endurtaka leikinn með mjög spennandi norskt landslið.

Kórónuveiran hefur haft mikil áhrif á alla í heiminum og ekki síst starf landsliðsþjálfarans enda hafa engir alvöru landsleikir farið fram á þessu ári fyrr en nú.

Alþjóða knattspyrnusambandið fékk Lars Lagerbäck í viðtal og spurði hann meðal annars út í kórónuveiruna en gamli íslenski landsliðsþjálfarinn er orðinn 72 ára gamall.

„Þetta hefur verið skrítinn og erfiður tími fyrir alla,“ sagði Lars Lagerbäck og var síðan spurður út í fjölskylduna sína sem hann talan jafnan lítið um.

„Það er allt í lagi með okkur. Dóttir mín fékk kórónuveiruna en hún náði sér. Eins og er þá líður öllum vel,“ sagði Lars Lagerbäck. Hann slapp hins vegar sem eru góðar fréttir enda kominn á áttræðisaldur.

„Ég hef bara verið á búgarðinum síðan í mars og það var nóg að gera hér. Ég hafði mikið að gera,“ sagði Lagerbäck.

„Ég átti annars frábært sumar eins og skrítið og það hljómar. Það var tími til að gera hluti sem ég vanalega kemst ekki í. Ég þarf vanalega að fylgjast með leikmönnum í fjórtán eða fimmtán löndum en nú var tími laus hjá mér,“ sagði Lars Lagerbäck.