Inter tilbúið að selja Eriksen aðeins átta mánuðum eftir að hafa keypt hann

Danski landsliðsmaðurinn Christian Eriksen gæti verið á förum frá Inter þrátt fyrir að hafa komið til félagsins fyrir aðeins átta mánuðum síðan.

Inter keypti Eriksen frá Tottenham fyrir sautján milljónir punda í lok janúar á þessu ári. Daninn hefur ekki staðið undir væntingum hjá Inter sem er tilbúið að losa sig við hann.

Eriksen var aðeins í byrjunarliði Inter í átta leikjum í ítölsku úrvalsdeildinni og hefur bara skorað eitt deildarmark fyrir liðið.

Inter vill fá 45 milljónir punda fyrir hinn 28 ára Eriksen samkvæmt Corriere dello Sport. Hann lék með Tottenham í sjö ár og skoraði 69 mörk í 305 leikjum fyrir Lundúnaliðið.

Á síðasta tímabili endaði Inter í 2. sæti ítölsku úrvalsdeildarinnar og komst í úrslitaleik Evrópudeildarinnar þar sem liðið tapaði fyrir Sevilla, 3-2. Eriksen kom inn á sem varamaður í leiknum.