Vill að ÍBV sitji við sama borð og önnur lið í bikarnum

Daníel Geir Moritz, formaður meistaraflokksráðs ÍBV, segir að knattspyrnuráð ÍBV hafi sent erindi á mótanefnd KSÍ vegna leikjaniðurröðun Mjólkurbikarsins.

Daníel segir frá því á Twitter-síðu sinni að ÍBV spili ekki í átján daga áður en liðið spilar undanúrslitaleik sinn í bikarnum.

Önnur lið í undanúrslitunum, það er að segja þá liðin í Pepsi Max deildinni, munu spila fjórum dögum áður og segir Daníel að þetta séu vissulega snúnir tímar en lið í bikar verða að sitja við sama borð.

„Knattspyrnuráð ÍBV búið að senda erindi á mótanefnd og vonir bundnar við eðlilega niðurstöðu,“ skrifaði Daníel.

ÍBV tryggði sér sæti í undanúrslitunum með 2-1 sigri á Fram en undanúrslitin fara fram 4. nóvember.

Hinir þrír leikirnir í átta liða úrslitunum fara fram 10. september en þá mætast FH og Stjarnan, Valur og HK og Breiðablik og KR.

ÍBV leikur sinn síðasta leik í Lengjudeildinni 17. október svo þá liða átján dagar þangað til að kemur að undanúrslitunum í Mjólkurbikarnum.