Góður gangur í Norðurá

Fyrstu dagarnir sem veiðimenn hafa verið við veiðar í Norðurá hafa sannarlega gefið góða von um að framundan sé gott laxveiðisumar eftir ansi magurt veiðisumar 2019.

Opnunin í Norðurá gekk vel og veiðin stígandi eins og gera mátti ráð fyrir. Samkvæmt okkar heimildum er áin að detta í 50 laxa sem er mjög viðunandi fyrir árstíma. Norðurá var á einum tíma ekki beint þekkt fyrir stóra laxa en síðustu ár hefur hlutfall stórlaxa sífellt verið að aukast líkt og í öðrum ám á landinu og þar má klárlega þakka "Veitt og Sleppt" sem og hóflegum kvóta í flestum ef ekki öllum ánum. Um helgina kom lax á land sem er hingað til samkvæmt okkar bestu vitund sá stærsti sem er kominn á land í sumar. Jóhannes Hinriksson staðarhaldari við Ytri Rangá er við veiðar ásamt Árna Baldurssyni og náði á land 88 sm gullfallegum tveggja ára laxi. Árni er líka kominn með nokkra laxa á land og það er engin furða þar sem þar er á ferðinni einn af landsins bestu veiðimönnum.