Þrír greindust innan­lands

Þrír einstaklingar greindust með kórónuveiruna innanlands í gær. Einstaklingarnir greindust á sýkla- og veirufræðideild Landspítalans og af þeim var einn í sóttkví og hinir tveir utan.

Á landamærunum greindust sex farþegar með kórónuveirusmit og beðið er eftir niðurstöðum mótefnamælingar í fimm tilfellum.

Þetta kemur fram í nýjustu tölfræði sem birt hefur verið á covid.is í dag.

Þá eru nú 113 í einangrun en í gær voru þau 115. Enginn liggur inni á sjúkrahúsi vegna COVID-19 sýkingar en einn lá inni í gær.

Alls eru 1.072 einstaklingar í sóttkví og hefur þeim fjölgað nokkuð síðan í gær þegar þeir voru 990. Flestir þeirra sem eru í sóttkví er að finna á höfuðborgarsvæðinu.

Starfsfólk sýkla- og veirufræðideildarinnar tók í gær 600 sýni og við landamæraskimun voru tekin 1.682 sýni. Íslensk erfðagreining tók 167.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur er nú 18,8, var 19,6 í gær. Þá er nýgengi landamærasmita nú 11,2, en var 11,5 í gær.