Skjálfti 3,7 að stærð norð­austur af Grinda­vík

Skjálfti 3,7 að stærð varð skammt frá Grindavík klukkan 13:43 í dag. Skjálftinn fannst víða á Reykjanesskaga, á höfuðborgarsvæðinu og alveg norður á Akranes.

Á vef Veðurstofunnar kemur fram að skjálftinn hafi orðið 2,7 kílómetra austur af Fagradalsfjalli eða um tíu kílómetrum norðaustur af Grindavík. Skjálftahrina hefur verið í gangi á svæðinu, en klukkan 7:10 í morgun varð skjálfti 2,8 að stærð á sömu slóðum.

„Veðurstofunni hafa borist tugir tilkynninga um það að skjálftans hafi orðið vart á Reykjanesskaga, höfuðborgarsvæðinu og norður á Akranes.

Mikil jarðskjálftavirkni hefur verið við Fagradalsfjall undanfarinn mánuð, en öflug jarðskjálftahrina hófst þar þann 19. júlí. Ríflega 5000 skjálftar hafa mælst á svæðinu síðan þá, sá stærsti 5.0 að stærð þann 20. júlí.

Þessi virkni er líklega af völdum spennubreytinga vegna endurtekinna kvikuinnskota á Reykjanesskaga sem hófst í lok janúar á þessu ári,“ segir í tilkynningu frá Veðurstofunni.