Nýklaktir páskaungar á Hvolsvelli

Nýklaktir páskaungar njóta nú lífsins á Hvolsvelli enda hafa þeir fengið góða umönnun hjá krökkunum í Hvolsskóla. Skólastjórinn hugsar um þá heima hjá sér í páskafríi skólans.

 

Það er orðin áralöng hefð í Hvolsskóla að þangað koma páskaungar í skólann nokkrum dögum fyrir páska þar sem nemendur geta fengið að fylgjast með þeim og halda á þeim.

 

„Já, við vorum að unga út og erum nú komin með tíu páskaunga. Við erum líka komin með hænsnakofa á skólalóðinni þar sem við setjum alltaf nokkrar hænur á hverju vori“, segir Birna Sigurðardóttir, skólastjóri.

 

 

 

„Já, þetta er mjög skemmtilegt, krökkunum finnst þetta virkilega gaman. Þetta er aðeins flóknara í ár því bæði erum við með færri nemendur og það má eins ekki halda jafn mikið á ungunum“, bætir Birna við.

 

Birna er með ungana heima hjá sér um páskana en krakkarnir fá væntanlega að sjá þá aftur eftir páska og þá hvað þeir hafa stækkað mikið.