Íva segir forsvarsmenn RÚV fara með rangt mál

Íva Marín Adrichem, sem keppti á úrslitakvöldi Söngvakeppninnar í gærkvöldi með lag sitt Oculis Videre, er verulega ósátt við vinnubrögð hjá starfsfólki Ríkisútvarpsins. Þrátt fyrir að hafa komið því á framfæri að hljóðnemi lykilraddar í bakröddum væri rafhlöðulaus hefði ekki verið brugðist við.

Þá hefðu þau fengið þau svör við beiðni sinni um að endurflytja lagið, strax að því loknu, að slíkt væri ekki hægt. Nú í dag væru svörin hins vegar á þá leið að þau hefðu þurft að falast eftir því. Sem Íva Marín segist sannarlega hafa gert.

Tæknivandræði fyrirferðamikil

Daði Freyr og Gagnamagnið komu, sáu og sigruðu í gærkvöldi og verða fulltrúar Íslands í Rotterdam í maí. Daði Freyr keppti við rokksveitina Dimmu í úrslitum en Íva Marín var á meðal þriggja atriða sem komust ekki í úrslitaeinvígið.

Hún segist í færslu á Facebook þakklát fyrir ómetanlegan stuðning og eitt besta kvöld lífs síns. Hún verði þó að koma á framfæri skoðunum sínum varðandi tæknileg mistök sem urðu á atriði hennar í ljósi mikillar umræðu á netinu. Fjölmörg tæknileg vandræði voru áberandi á úrslitakvöldinu og má segja að landsmenn hafi farið hamförum á Twitter þar sem tæknifólki Ríkistútvarpsins var ýmist lastað eða tekið til varna fyrir það.

„Í upphafi ætlaði ég ekki að tjá mig um málið en þar sem forsvarsfólk keppninar er farið að svara fyrir sig á opinberum vetvangi neyðist ég eiginlega til að segja mína hlið á málinu,“ segir Íva Marín.

„Í flutningnum á úrslitakvöldinu varð míkrófónn Söndru, sem syngur efsta sópran í bakröddunum batteríslaus. Við söngkonurnar létum skýrt vita að ekkert heyrðist í Söndru áður en lagið hófst með þeirri von um að hægt væri að koma hljóðnemanum í gang.“ 

Vakti athygli á klúðrinu í viðtali

Það hafi ekki tekist og því vantaði 20% af söngnum. Það séu hún og útsetjari bakraddanna sammála um.

„Þegar í græna herbergið var komið var flutningur á síðasta atriði kvöldsins í fullum gangi og við Sandra óskuðum eftir að flytja lagið aftur. Við fengum engin svör nema það að það væri ekki hægt, tæknilegir örðugleikar koma fyrir í beinni útsendingu,“ segir Íva Marín.

Flutninginn í gærkvöldi má heyra að neðan.

Hún vakti raunar athygli á því í viðtali við Björgu Magnúsdóttur í Græna herberginu skömmu eftir að hún flutti lagið. Á þeim tímapunkti óskaði hún þó ekki eftir endurflutningi.

Rúnar Freyr Gíslason, starfsmaður framkvæmdastjórnar Söngvakeppninnar, svarar gagnrýni varðandi þetta í Facebook-hópnum Júróvisíón 2020.

Hinn höfundurinn heyrði ekkert

„Ef upptökustjóri og aðrir í RÚV-starfsliði taka ekki eftir að neitt sé að (eins og var í þessu tilviki) þá er gert ráð fyrir að höfundur/ar óski eftir að fá að flytja lag aftur og þá er það auðvitað tekið til skoðunar. Höfundar þessa lags óskuðu ekki eftir því í gærkvöldi.“

Hann bendir á að annar höfundur lagsins hafi verið spurður út í þetta atriði eftir flutninginn. Sá hafi ekki tekið eftir neinu. Ef fólkið hennar Ivu hafi ekki einu sinni tekið eftir þessu, hvað eigi að gera?

„Höfundar fóru ekki fram á að flytja lagið aftur. Ég persónulega hef hlustað ótal oft á lagið og heyrði ekki mun. Vissi ekki neitt fyrr en Íva sagði frá því,“ segir Rúnar Freyr.

Íva Marín segir alveg rétt að hinn höfundur lagsins hafi ekki tekið eftir að sópraninn vantaði en allir aðrir Í hópnum gert það. 

Að neðan má heyra flutninginn á undanúrslitakvöldinu. Lesendur geta því gert sinn eigin samanburð og athugað hvort þeir heyri muninn frá því í gærkvöldi.

Finnst vinnubrögðin óásættanleg

„Raunar var algjört kraftaverk að hinar þrjár bakraddirnar héldu lagi þar sem sópraninn gegnir lykilhlutverki í útsetningunni. Nú segja forsvarsmenn keppninar að höfundur verði að óska eftir endurflutningi en þar sem það var gert skil ég ekki að ég hafi ekki fengið að fara aftur á svið. Líklegasta skýringin fannst mér að við áttum að koma í viðtal strax eftir flutning síðasta lagsins og því hafi ekki verið tími,“ segir Íva Marín. 

Hún segist ekki ætla að tjá sig frekar um málið en lýkur ræðu sinni svona:

„Mér finnst ótrúlega leiðinlegt að þetta hafi komið upp og að greinilega hafi um stóran misskilning verið að ræða. Þó finnst mér þau vinnubrögð að checka ekki á rafhlöðum í hljóðnemum óásættanleg því það er af mér vitandi alltaf gert fyrir hvern flutning. Þar sem við létum skýrt vita fyrir flutninginn hefði mér einnig fundist réttast að lagið væri stöðvað og skipt um hljóðnema.“

Íva Marín var í viðtali í Íslandi í dag fyrir nokkrum vikum. Viðtalið vakti mikla athygli.