Frum­sýningu No Time to Die frestað vegna kórónu­veirunnar

Framleiðendur nýjustu kvikmyndarinnar um James Bond, No Time to Die, tilkynntu í dag að þau hyggist fresta frumsýningu myndarinnar fram í nóvember.

Ástæðan er útbreiðsla kórónuveirunnar sem veldur sjúkdómnum COVID-19 um heimsbyggðina en kvikmyndahúsum hefur verið lokað í Kína, Suður-Kóreu, Ítalíu og Japan.

Allt eru þetta stórir markaðir fyrir bíómyndir en að því er fram kemur á vef Variety er mikilvægt fyrir framleiðendur myndarinnar að aðsóknin verði mikil alls staðar í heiminum vegna þess hversu dýr hún var í framleiðslu.