Vonast til að Barcelona geti stöðvað sigur­göngu Lyon

Á morgun hefjast 8-liða úrslit Meistaradeildar Evrópu. Hin norska Caroline Graham Hansen vonast til að lið sitt – Barcelona – geti komið í veg fyrir að franska stórliðið Lyon vinni sinn fimmta Meistaradeildar titil í röð. 

Þetta kemur fram í ítarlegu viðtali breska miðilsins The Telegraph.

Landsliðsfyrirliðinn Sara Björk Gunnarsdóttir gekk í raðir Lyon fyrr í sumar. Hún og Caroline Hansen léku saman hjá þýska liðinu Wolfsburg frá árinu 2016 til 2019.

„Ef þið, sem lið, viljið vinna titilinn er ljóst að þið verðið að vinna Lyon því ef þið mætið þeim ekki á leiðinni í úrslitaleikinn þá mætið þið þeim þar. Þær eru stærsta hindrunin á leiðinni að titlinum því þær hafa verið besta lið heims undanfarin fimm ár,“ segir Hansen til að mynda í viðtalinu.

Caroline Hansen getur hins vegar ekki stöðvað Lyon fyrr en í úrslitaleiknum en það er ljóst að liðin geta ekki mæst í undanúrslitum.

Hansen er 25 ára í dag og eðlilega einn af betri leikmönnum Noregs, annars væri hún ekki í stjörnuprýddu liði Barcelona sem vann spænsku úrvalsdeildina á síðustu leiktíð. Meðal leikmanna liðsins má nefna Jennifer Hermoso, Lieke Mertens og Asisat Lamina Oshoala.

Það hefur hjálpað henni að þegar hún var 15 ára skrifaði hún undir samning hjá Stabæk og spilaði með kvennaliði félagsins en æfði samt sem áður með strákunum.

„Kvenkyns Messi er að koma æfa með okkur,“ segir Endre Lubeck, fyrrum leikmaður Stabæk og núverandi íþróttablaðamaður í Noregi, að strákarnir hafi hvíslað sín á milli.

„Hún getur gert eitthvað sem ekkert okkar býst við, sem engum á vellinum dettur í hug. Við vorum með eitt besta yngri flokka lið í Noregi á þessum tíma og við tókum henni eins og einni af okkur, sem er það sem hún vildi,“ sagði Lubeck einnig.

Það er ljóst að komist Börsungar alla leið í úrslit – og mæti Lyon – annað árið í röð þá gæti Caroline Graham Hansen loks náð fram hefndum gegn franska félaginu.

Ástæðan er sú að Ada Stolsmo Hegerberg sleit krossbönd í hné í janúar á þessu ári og hefur ekkert leikið síðan. Ada skoraði þrennu er Lyon lagði Börsunga af velli á síðustu leiktíð, lokatölur 4-1.

Árið áður skoraði hún eitt mark er Börsungar unnu Wolfsburg 4-1 í framlengdum leik. Sara Björk var í byrjunarliði Wolfsburg í þeim leik.