Lögreglan má sekta grímulausa um 100 þúsund krónur

Með nýjum fyrirmælum ríkissaksóknara, sem tóku gildi á föstudag, hefur lögreglan heimild til að sekta fyrir margvísleg brot á tveggja metra reglunni og reglum um grímunotkun. Heildarútlistun á sektum má nálgast hér neðar í fréttinni, eins og þau birtast í fyrirmælum ríkissaksóknara.

Embættið segist jafnframt leggja áherslu á það lögreglan meti hvert tilvik fyrir sig og og ákvarði sektarfjárhæð með hliðsjón af alvarleika brots - „en ljóst er að brotin geta verið afar mismunandi og þar með mis alvarleg,“ segir ríkissaksóknari.

Í því samhengi eru nefnd möguleg brot á ákvæðum um einangrun smitaðra. Brotin gætu varðað við hegningarlög, nánar tiltekið 175 grein. Hún kveður á um að hver sá sem brýtur varnir gegn næmum sjúkdómum eða varúðarreglum yfirvalda eigi að sæta allt að þriggja ára fangelsi. „Refsingin getur þó orðið fangelsi allt að 6 árum, ef um sjúkdóma er að ræða, sem hið opinbera hefur gert sérstakar ráðstafanir til að hefta eða afstýra, að berist hingað til lands,“ segir einnig í 175. grein sem ríkissaksóknari vísar til.

Í fyrirmælum embættisins er tekið eftirfarandi dæmi: „[A]ð sakborningur geri nokkurn hóp manna útsettan fyrir sýkingu eða sýki hóp manna af COVID-19 og enn alvarlegra ef um er að ræða að útsetja eða sýkja þá sem eru í sérstakri hættu vegna undirliggjandi sjúkdóma.“ Ef slíkt mál kæmi upp ætti lögreglan strax að upplýsa ríkissaksóknara og héraðssaksóknara um málið.

Embættið óskar samhliða eftir því að lögreglustjórar landsins sendi ríkissaksóknara allar upplýsingar um ætluð brot á fjarlægðarmörkum og grímunotkun. Það sé nauðsynlegt til að tryggja yfirsýn og samræmi í afgreiðslum lögreglustjóra. 

Rétt er að taka fram að ekki er almenn grímuskylda í landinu. Við aðstæður þar sem ekki er hægt að hafa tveggja metra fjarlægð á hins vegar að nota hlífðargrímu sem hylur munn og nef. Nánar hér á vef Landlæknis.

Sektirnar sem ríkissaksóknari tiltekur í nýju fyrirmælunum eru eftirfarandi:

Brot gegn reglugerð heilbrigðisráðherra nr. 759/2020 um sóttkví, einangrun og sýnatöku við landamæri Íslands vegna COVID-19:

Brot gegn skyldu til að fara/vera í sóttkví, 1. og 3. mgr. 3. gr.

Sekt ákvarðist eftir alvarleika brots kr. 50.000-250.000. 

Brot gegn skyldum þeirra sem eru í sóttkví, 5. gr.

Sekt ákvarðist eftir alvarleika brots kr. 50.000-250.000. 

Brot á reglum um einangrun, 1. og 2. mgr. 9. gr.

Sekt ákvarðist eftir alvarleika brots kr. 150.000-500.000. Sektarheimild nær einungis til fyrsta brots. 

Brot gegn reglum skv. auglýsingu heilbrigðisráðherra nr. 792/2020 um takmörkun á samkomum vegna farsóttar: 

Brot á reglum um fjöldatakmörkun, 3. gr.

Sekt einstaklings sem sækir samkomu kr. 50.000.

Sekt forsvarsmanns/skipuleggjanda sem stendur fyrir samkomu kr. 250.000- 500.000.

Sektarheimild nær einungis til fyrsta brots forsvarsmanns/skipuleggjanda. 

Brot gegn skyldu til að tryggja að hægt sé að hafa a.m.k. 2 metra á milli einstaklinga sem ekki deila heimili, 1. mgr. 4. gr. 

Sekt forsvarsmanns/skipuleggjanda þeirrar starfsemi/samkomu sem um ræðir ákvarðist eftir alvarleika brots kr. 100.000-500.000.

 Sektarheimild nær einungis til fyrsta brots. 

Brot á reglum um notkun andlitsgrímu, 2. mgr. 4. gr.

Sekt forsvarsmanns þeirrar starfsemi sem um ræðir ákvarðist eftir alvarleika brots kr. 100.000-500.000.

Sekt einstaklings sem notar ekki andlitsgrímu ákvarðist eftir alvarleika brots kr. 10.000-100.000 

Brot á reglum um lokun samkomustaða og starfsemi vegna sérstakrar smithættu, 1. mgr. 7. gr.

Sekt ákvarðist eftir alvarleika brots kr. 100.000-500.000.