Sænskir áhrifavaldar að missa sig yfir Daða

Svo virðist sem sænskir áhrifavaldar séu hreinlega að missa sig yfir lagi Daða Freys og Gagnamagninu í Söngvakeppninni og má það rekja til áhuga Söru Linderholm á bandinu.

Sara er með um 130 þúsund fylgjendur á Instagram og hefur hún deilt myndböndum af sér að dansa og syngja með laginu Think about things.

Daði Freyr og Gagnamagnið taka þátt á úrslitakvöldinu í Laugardalshöllinni á laugardaginn og telja veðbankar að líklegast sé að sveitin fari alla leið og verði framlag Íslands í Eurovision í Rotterdam í maí.

Eftir að Sara Linderholm byrjaði að deila áhuga sínum á laginu fóru fleiri sænskir áhrifavaldar að opna sig um áhuga sinn á atriðinu í kjölfarið, og margir þeirra flytja bút úr laginu á hljóðfæri.

Hér að neðan má sjá samantekt Söru frá myndböndum sem hún setti inn eða var merkt á á Instagram. Þar sendir Daði sjálfur henni meðal annars kveðju.