Danske Bank fækkar stöðu­gildum um 400

Danske Bank hefur fækkað stöðugildum um fjögur hundruð og sagt upp 230 manns. Frá þessu greinir bankinn í yfirlýsingu í morgun.

„Þar sem þörf er á að draga úr rekstrarkostnaði mun Danske Bank fækka stöðugildum um 400,“ segir í tilkynningu frá bankanum.

Greint var frá því í janúar að tvö þúsund starfsmönnum bankans hafi boðist að semja um starfslok. Bankinn hafði þá þegar tímabundið lokað á allar nýráðningar. Einungis sextíu manns þáðu boðið og nú hefur verið greint frá því að 230 verði sagt upp vegna aðhaldsaðgerðanna.

Af þeim 230 sem missa vinnuna starfa um 120 manns í Danmörku. Þar að auki missa sextíu manns vinnuna í Finnlandi og 33 í Litháen. Þá missa einhverjir starfsmenn bankans vinnuna í Svíþjóð og Noregi.