Látinn fara án þess að spila sekúndu en fær samt tvo milljarða frá félaginu

Dion Waiters fær borgaðan út samning sinn hjá Memphis Grizzlies þrátt fyrir að spila aldrei fyrir liðið.

Memphis Grizzlies vildu svo mikið losna við Dion Waiters að þeir eru tilbúnir að borga honum meira en tvo milljarða fyrir restina af þessu tímabil og allt næsta tímabil.

Dion Waiters kom til Memphis í leikmannaskiptum við Miami Heat og Minnesota Timberwolves en hann hefur leikið með Miami Heat undanfarin fjögur tímabil. Waiters hluti af skiptunum sem færði Miami liðinu Andre Iguodala frá Grizzlies.

The Grizzlies have waived guard Dion Waiters, league sources tell @TheAthleticNBA@Stadium. Waiters will receive his pay for the remainder of this season and $12.6M in 2020-21.

— Shams Charania (@ShamsCharania) February 9, 2020

Dion Waiters hefur reyndar verið í tómu tjóni á þessu tímabili vegna meiðsla og leikbanna og kom ekki við sögu í 45 fyrstu leikjum Miami Heat á tímabilinu. Það komst meðal annars upp um það þegar hann þóttist vera veikur en hélt síðan upp á 28 ára afmælið sitt með veglegri veislu.

Það var líklega kornið sem fyllti mælinn. Hann fékk sex leikja bann hjá félaginu og Miami Heat losaði sig síðan við hann.

Waiters náði því aðeins að spila þrjá leiki fyrir Miami áður en félagið losaði sig við samninginn hans en var þá með 9,3 stig og 3,7 fráköst að meðaltali á 14 mínútum í leik.

Dion Waiters getur samið við annað lið í NBA-deildinni og einhverjar sögusagnir voru um að Los Angeles Lakers hafi áhuga á honum. Hann er enn bara 28 ára gamall og er hæfileikaríkur leikmaður.